हरिश्चन्द्र बाग, कञ्चनपुर, १४ मङ्सिर । श्री धर्याल बागकोट एकता समाजको पहिलो वार्षिक साधारण सभा शनिबार महेन्द्रनगरमा सम्पन्न भएको छ । तदर्थ समितिका अध्यक्ष मदन सिंह क्षेत्रीको सभाध्यक्षतामा बसेको साधारण सभाले समाजले हालसम्म सञ्चालन गरेका कार्यक्रम, निर्णय तथा आर्थिक प्रतिवेदन सर्वसम्मतरूपमा पारित गरेको सचिव नवीन बहादुर चन्दले जानकारी दिनुभयो । सभाले पोहोर गठन भएको सात सदस्यीय तदर्थ समितिमा थोरै हेरफेर गरी कार्यसमिति बनाएको छ ।
यस वर्षको पुनर्गठनमा पुरानो समितिका कोषाध्यक्ष बलदेव प्रसाद बागले जिम्मेवारी हस्तान्तरण गर्ने प्रस्ताव राखेपछि तत्कालीन सदस्य नारायण सिंह ठगुन्नालाई कोषाध्यक्षमा मनोनीत गरिएको छ भने लक्ष्मी चन्दलाई नयाँ सदस्यका रूपमा समावेश गरिएको छ । अन्य सबै पदाधिकारी यथावत् रहनु भएको छ । अब कार्यसमितिमा अध्यक्ष मदन सिंह क्षेत्री, उपाध्यक्ष पदम बहादुर चन्द, सचिव नवीन बहादुर चन्द, कोषाध्यक्ष नारायण सिंह ठगुन्ना तथा सदस्यहरू शुक्र बहादुर चन्द, कृष्ण बहादुर चन्द र लक्ष्मी चन्द रहनु भएको छ ।
तत्कालीन कोषाध्यक्ष बलदेव प्रसाद बागलाई मानार्थ आमन्त्रित सदस्यका रूपमा मानिएको छ । सोही साधारण सभाबाट सल्लाहकार समिति पनि चयन गरिएको छ । सल्लाहकार समितिमा सूर्यबहादुर चन्द, हजारी चन्द, भवानी दत्त बाग, मन्दिर सिंह ठगुन्ना, हरि दत्त बाग, सीता चन्द र लक्ष्मी ठगुन्ना चयन हुनुभएको छ ।
समाजका उपाध्यक्ष पदम बहादुर चन्दका अनुसार बैतडीको मेलौली नगरपालिका ३ बागकोट मूल थलो भएका र अहिले कञ्चनपुर तथा कैलालीका विभिन्न क्षेत्रमा बसोबास गर्दै आएका व्यक्तिहरूलाई एक आपसमा जोड्ने उद्देश्यले समाज सक्रिय हुँदै आएको छ ।
पहिलो साधारण सभाबाट अनुमोदित कार्यसमितिले अब सदस्यता विस्तार, सामाजिक र सांस्कृतिक कार्यक्रम, शैक्षिक सहयोग तथा सामुदायिक हितका योजनाहरूलाई प्राथमिकताका साथ अघि बढाउने जस्ता कार्य गर्ने अध्यक्ष मदन सिंह क्षेत्रीको भनाइ छ ।
