कञ्चनपुर, २० माघ । सुदूरपश्चिम प्रदेशका कञ्चनपुर र कैलाली जिल्लामा बसोबास गर्ने रानाथारु समुदायले शुक्रबार सूचीकृत दिवस मनाएका छन् । नेपाल रानाथारु समाजले कञ्चनपुर र कैलालीका विभिन्न रानाथारु बस्तीहरूमा दिवस मनाएका छन् । यता कञ्चनपुरमा भने भीमदत्त नगरपालिकाको सभा हलमा नेपाल रानाथारु समाज कञ्चनपुरका अध्यक्ष प्रेमवती रानाको अध्यक्षता एवं नेपाल रानाथारु समाजका केन्द्रीय अध्यक्ष तथा संविधान सभा सदस्य कृपाराम रानाको प्रमुख आतिथ्यमा एक कार्यक्रमको आयोजना गरी दिवस मनाइएकाे छ ।
रानाथारु समुदायलाई समेत आदिवासीमा सूचीकरण गरेसँगै राज्यका थुप्रै क्षेत्रमा रानाथारु समुदायको प्रतिनिधित्व भइरहेको रानाथारु अगुवाहरूले बताएका छन् । कार्यक्रममा रानाथारु समुदायको लोक संस्कृति झल्किने नृत्य समेत प्रस्तुत गरिएकाे बताइएको छ । सरकारले रानाथारु समुदायलाई समेत आदिवासी जनजातिमा सूचीकरण गरेसँगै कञ्चनपुर र कैलालीका रानाथारु समुदाय हर्षित भएका छन् ।
