हरिश्चन्द्र बाग, कञ्चनपुर । राष्ट्रिय वाणिज्य बैङ्क लिमिटेड शाखा कार्यालय श्रीपुर बेलौरी कञ्चनपुरबाट लिएको कर्जा / सुविधा, चुक्ता / नियमित गर्न २१ जनाको नाममा सूचना जारी गरिएको छ । राष्ट्रिय वाणिज्य बैङ्क केन्द्रीय कार्यालयको कर्जा अनुगमन तथा असुली विभागले पुस १४ गतेको गोरखापत्र दैनिकमा राष्ट्रिय वाणिज्य बैङ्क लिमिटेड श्रीपुर बेलौरी शाखाको कालो सूचि सम्बन्धी ३५ दिने सूचना प्रकाशन गरेको हो । सूचनामा उल्लेख भए अनुसार उक्त शाखा कार्यालयबाट युवा स्वरोजगार कर्जा लिनु भएका तर सावाँ तथा ब्याज भुक्तानी नगर्नु भएका कर्जा ग्राहकहरूले मिति २०७९ माघ १८ गते भित्र उक्त शाखामा आफ्नो बक्यौता रकम भुक्तानी गर्न आउनु हुन अनुरोध गरिएको छ । उक्त समयावधि भित्र कर्जा चुक्ता नभएमा संलग्न सूचि बमोजिमका कर्जा ग्राहकहरू र जमानिदाताहरुलाइ कालो सूचिमा राखिने राष्ट्रिय वाणिज्य बैङ्क लिमिटेड श्रीपुर बेलौरी शाखाका प्रबन्धक महेशराज भट्टले जानकारी दिनु भएको छ ।
उक्त बैङ्कको शाखा कार्यालय श्रीपुर बेलौरी, कञ्चनपुरबाट कर्जा/सुविधा लिई सो कर्जा/सुविधाको भाखा नाघेका २१ जना ऋणी तथा जमानतदाताहरू समेतलाई कर्जा/सुविधा, चुक्ता/नियमित गर्नको लागि सम्पर्क, पत्राचार गर्दा कतिपयको पत्र फिर्ता आउने, कतिपयले बैङ्कको अनुरोधलाई बेवास्ता गर्ने गरेको बैङ्कले जनाएको छ । सो सूचना प्रकाशित भएको मितिले ३५ दिन भित्र आफूले लिएको कर्जा/सुविधा बापतको रकम चुक्ता/नियमित गर्नको लागि ऋणी, जमानतदाता तथा सम्बन्धित सबैको जानकारीको लागि बैङ्कले सो सूचना प्रकाशन गरेको हो । उक्त सूचना प्रकाशित मितिले ३५ (पैँतीस) दिनभित्र बैङ्कको लेना रकम चुक्ता/नियमित नभएको अवस्थामा नेपाल राष्ट्र बैङ्कबाट इजाजत पत्र प्राप्त बैङ्क तथा वित्तीय संस्थाहरूको नाममा जारी एकीकृत निर्देशन २०७८ को इ.प्रा. निर्देशन नं. १२०७८ को दफा १२ मा भएको व्यवस्था अनुसार सोही सूचनालाई ३५ (पैँतीस) दिने सूचना मानी ऋणी तथा जमानतदाताहरू समेतको नाम कालो सूचीमा समावेश गरिने भएकोले उक्त सूचनाबाट कसैको मान प्रतिष्ठामा कुनै आँच आएमा बैङ्क जवाफदेही नहुने ब्यहोरा समेत सोही सूचनाद्वारा सूचित गराइएको छ ।
