सुदूरपश्चिममा पुनः भूकम्प

पर्यावरण

गृहपृष्ठ
पर्यावरण
सुदूरपश्चिममा पुनः भूकम्प

सुदूरपश्चिममा पुनः भूकम्प

शनिबार, कात्तिक २६, २०७९NB Media Network

हरिश्चन्द्र बाग, कञ्चनपुर, २६ कार्तिक । सुदूरपश्चिममा पुनः भूकम्प गएको छ । बझाङको पाटादेवल नजिक केन्द्रबिन्दु भएर शनिबार राति ०८ बजेर १२ मिनेटमा ५ दशमलव ४ म्याग्निच्युडको भूकम्प गएको राष्ट्रिय भूकम्प मापन तथा अनुसन्धान केन्द्रले जनाएको छ । सुदूरपश्चिम प्रदेशका सबै जिल्ला, कर्णाली र लुम्बिनी प्रदेशका केही भूभाग र सीमावर्ती भारतीय भूभागमा उक्त भूकम्पको धक्का महसुस गरिएको छ ।

यसअघि बुधबार राति ११ बजेर २८ मिनेटमा बाजुराको बाह्रबिस नजिक केन्द्रबिन्दु भएर ४ दशमलव १ म्याग्निच्युडकाे भूकम्प गएको थियो । त्यसअघि डोटीमा रहेको खप्तड राष्ट्रिय निकुञ्ज आसपास केन्द्रबिन्दु बनाएर मंगलबार राति ०९ बजेर ०७ मिनेटमा ५ दशमलव ७ म्याग्निच्युडको भूकम्प, सोही क्षेत्रलाई केन्द्रबिन्दु बनाएर राति ०९ः५६ बजेको समयमा ४ दशमलव १ म्याग्निच्युडको भूकम्प र राति ०२:१२ बजेको समयमा ६ दशमलव ६ म्याग्निच्युडको ठूलै भूकम्प गएको थियो ।

डोटी केन्द्रबिन्दु बनाएर गएको ६ दशमलव ६ म्याग्निच्युडको भूकम्पले त डोटीमा ठूलै धनजनको क्षति गरेको थियो । भूकम्पले घर भत्काउँदा डोटीको पूर्वीचौकी गाउँपालिका वडा नम्बर ३ मा ६ जनाको मृत्यु भयो भने केही व्यक्ति घाइते समेत भएका थिए ।डोटी, अछाम, बझाङ लगायतका स्थानमा दर्जनौँ घरमा क्षति पुग्यो । केही ठाउँमा पहिरो समेत गएको बताइएको छ । त्यसको धक्का पश्चिम नेपालका पुरै भूभाग र भारतको राजधानी दिल्लीसम्म महसुस गरिएको थियो । मंगलबार रातिदेखि सुदूरपश्चिममा पटक पटक भूकम्प र पराकम्पको धक्का महसुस गरिएको छ ।

प्रकाशित मिति: शनिबार, कात्तिक २६, २०७९