हरिश्चन्द्र बाग, कञ्चनपुर, ०४ बैशाख । कञ्चनपुरको बेलौरी बजार नजिकै रु. एक करोड ५० लाखको अनुमानित लगानीमा कालिका मन्दिर निर्माण भइरहेको छ । धार्मिक पर्यटकीय क्षेत्रका रूपमा विकास गर्ने उद्देश्यका साथ कालिका मन्दिर निर्माण गर्न लागिएको बताइएको छ । दशकौँ पहिला गोरखाकालीको नामले निर्माण गरिएको मन्दिर जीर्ण बन्दै गएपछि स्थानीय सरकार र जनसमुदायको संयुक्त लगानीमा कालिका मन्दिर निर्माण गर्न लागिएको बेलौरी नगरपालिका वडा नम्बर ४ का वडाध्यक्ष अर्जुन ढकालले बताउनु भयो ।
धार्मिक पर्यटकीय क्षेत्रका रूपमा विकास गर्न र आस्थावान् नागरिकहरूको सहजताका लागि बेलौरी नगरपालिकाले नगर क्षेत्रभित्र थुप्रै धार्मिक तथा पर्यटकीय क्षेत्रको विकास गरिरहेको छ भने वडा नम्बर ४ ले कालिका मन्दिरलाई विशेष प्राथमिकता दिएको वडाध्यक्ष ढकालको भनाइ छ । हालसम्म बेलौरी नगरपालिका कार्यालय एवं वडा नम्बर ४ को कार्यालयबाट रु. ३५ लाख जति र सोही बराबर स्वदेश तथा विदेशमा रहेका कञ्चनपुरबासीहरूबाट सहयोग प्राप्त भई रु. ७० लाख जति रकम खर्च भइसकेको कालिका मन्दिर निर्माण उपभोक्ता समितिका अध्यक्ष प्रकाशराज पन्तले जानकारी दिनुभयो ।
हिन्दु धर्म प्रति आस्था राख्ने भक्तजनहरूको सहयोग र सक्रियतामा सुदूरपश्चिम प्रदेशकै धार्मिक पर्यटकीय स्थलका रूपमा स्थापित हुने गरी आकर्षक एवं सुनको गजुर सहित रु. १ करोड ५० लाख लगानीको अनुमानित योजना बनाइ कालिका मन्दिर निर्माण कार्य भइरहेको छ । यसै हप्ता मात्रै पनि मुख्य मूर्ति स्थापनाका लागि बेलौरी युवा मञ्च जापानद्वारा २ लाख २५ हजार आर्थिक सहयोग प्राप्त भएको समितिले जनाएको छ । श्रद्धालु भक्तजनहरूले कालिका मन्दिर निर्माणका लागि दान गर्ने क्रम समेत जारी रहेको छ । मन्दिर निर्माणका क्रममा प्रधानमन्त्री शेर बहादुर देउवा सहित थुप्रै शीर्ष नेताहरूले पनि मन्दिरको अवलोकन भ्रमण गरिसक्नु भएको छ ।
