हरिश्चन्द्र बाग, कञ्चनपुर, ०४ माघ । कञ्चनपुरको कृष्णपुर नगरपालिका वडा नम्बर ३ को चित्रपुर चोकदेखि आजबाट अव्यवस्थित बसोबासी, भूमिहीन दलित र भूमिहीन सुकुम्वासीहरूको जग्गा नाप जाँचको काम सुरु गरिएको छ । कृष्णपुर नगरपालिकाका नगर प्रमुख हेमराज ओझाले जग्गा नाप जाँचको शुभारम्भ गर्दै वडा नम्बर ३ मा एक महिना भित्रै जग्गा नाप जाँच गरिसक्ने योजना रहेको बताउनु भएको छ । जग्गाधनी पुर्जा भन्दाभन्दै पचासौँ वर्षदेखि नगरवासी पर्खिरहेकाले यस पटक जसरी पनि नागरिकले पुर्जा पाउने उहाँको दाबी छ । पछिल्लो समय सरकार फेरबदलसँगै जग्गा नाप जाँच रोकिने पो हो कि भन्ने धेरै जनामा चिन्ता रहे पनि नाप जाँचको काम नरोकिने र यो कार्य निरन्तर अगाडि बढ्ने हुँदा नगरवासीलाई ढुक्क हुन उहाँले आग्रह गर्नुभएको छ । हाल कृष्णपुर नगरपालिकाको भूमि इकाईमार्फत वडा नम्बर १, २, ४ र ९ मा नयाँ नापी र वडा नम्बर ७ र ८ मा अधुरा अपुरा (सेतो पुर्जावाला) जग्गा नाप जाँचको काम भइरहेको छ ।
