वर्षामा भिज्दै देउडा खेलमा झुम्यो सितानगर

मनोरञ्जन

गृहपृष्ठ
मनोरञ्जन
वर्षामा भिज्दै देउडा खेलमा झुम्यो सितानगर

वर्षामा भिज्दै देउडा खेलमा झुम्यो सितानगर

सोमबार, भदौ २०, २०७९NB Media Network

हरिश्चन्द्र बाग, कञ्चनपुर, २० भदौ । कञ्चनपुरको बेलौरी नगरपालिका वडा नम्बर ५ स्थित सितानगरमा आइतबारदेखि सिताराम गौरा समितिको आयोजनामा देउडा खेल कार्यक्रम सञ्चालन गरिएको छ । सुदूरपश्चिमेलीहरूको महान् पर्व गौराका अवसरमा उक्त कार्यक्रम आयोजना गरिएको समितिका अध्यक्ष आई जङ्ग कुँवरले जानकारी दिनुभयो । आइतबार दिउँसो पूर्व सांसद एवं संविधानसभा सदस्य दिवान सिंह बिष्टको प्रमुख आतिथ्यमा उद्घाटन गरिएको देउडा खेल कार्यक्रम वर्षाकै बिच पनि अबेर साँझसम्म जारी रह्यो ।

स्थानीय तथा राष्ट्रिय कलाकारहरूको उपस्थितिमा देउडिया तथा देउडा पारखीहरू वर्षामा भिज्दाभिज्दै पनि देउडा खेलमा रमेको दृश्य देखिन्थ्यो । उक्त कार्यक्रममा कञ्चनपुरको बेलौरी, बेलडाँडी, लालझाडी, पुनर्वास लगायत अन्य पालिकाहरूबाट समेत देउडा पारखीहरूको उपस्थिति रहेको जनाइएको छ । यद्यपि वर्षाका कारण आइतबार देउडा पारखीहरूको अपेक्षाकृत उपस्थिति हुन नसके पनि सोमबार बिहान १० बजेदेखि देउडा खेलको कार्यक्रमलाई निरन्तरता दिइने आयोजक समितिका अध्यक्ष कुँवरले जानकारी दिनुभएको छ । उहाँका अनुसार, सोमबार दिनभर कलाकारहरू दीर्घ फुलारा, भुवन दाहाल, कल्पना खड्का, नन्दा कार्की, अस्मिता वडैला र स्थानीय कलाकारहरूको समेत जोडदार प्रस्तुति रहने छ ।