हरिश्चन्द्र बाग, कञ्चनपुर, ०२ माघ । कञ्चनपुरका स्थानीय तहहरूले छाडा पशु चौपाया व्यवस्थापनका लागि करोडौँ रकम खर्च गर्दा समेत समस्या भने समाधान भएको छैन । स्थानीय तहको अघिल्लो सरकारले ५ वर्ष र अहिलेको नयाँ सरकारले ६ महिनाको अवधिमा चार करोड भन्दा बढी खर्च गरिसकेका छन् । तर छाडा पशु चौपायाको समस्या हटेको छैन ।.कञ्चनपुरमा छाडा पशु चौपायाको समस्या झनझन विकराल बन्दै गएको छ । राजमार्ग क्षेत्रदेखि किसानका खेतबारीसम्मै छाडा पशु चौपायाको बिगबिगी छ ।
आर्थिक वर्ष २०७४।०७५ देखि चालु आर्थिक वर्ष ०७९।०८० को हालसम्ममा कञ्चनपुर जिल्लाका नौ पालिकाहरू मध्ये बेलौरी र पुनर्वास नगरपालिका बाहेक बाँकी सात पालिकाहरूले साढे पाँच वर्षको अवधिमा चार करोड भन्दा बढी खर्च गरे पनि प्रभावकारी उचित व्यवस्थापन नहुँदा छाडा पशु चौपायाको समस्या ज्युँका त्युँ छ । यस अवधिमा शुक्लाफाँटा नगरपालिकाले १ करोड ८० लाख, वेदकोट नगरपालिकाले १ करोड २१ लाख, भीमदत्त नगरपालिले ९१ लाख ५० हजार, दोधाराचाँदनी नगरपालिकाले ८५ लाख ७७ हजार, बेलडाँडी गाउँपालिकाले २८ लाख, कृष्णपुर नगरपालिकाले २२ लाख र लालझाडी गाउँपालिकाले ८ लाख रकम खर्च गरिसकेका छन् । स्थानीय तहहरूले बनाएका कान्जी हाउसहरूमा समेत पशु चौपायाको बेहाल छ । दैनिक रोग र भोक प्यासले पशु चौपाया मरिरहेका छन् ।
पशु चौपाया व्यवस्थापन गर्न नसकेर सबैभन्दा बढी आलोचित भएको वेदकोट नगरपालिकाले अब पशु बिमा कार्यक्रम लागु गर्ने र माथिल्लो सरकारको सहयोगमा कम्पोस्ट मल कारखाना सञ्चालन गरी छाडा पशु चौपायालाई सम्पत्तिको रूपमा स्विकार्ने जनाएको छ । छाडा पशु चौपाया व्यवस्थापनका नाममा कार्यकर्ता भर्तिकेन्द्र र बजेट दोहन मात्रै भएको आरोप लाग्ने गरेको छ । कतिपय ठाउँका किसान त छाडा पशु चौपाया धपाउनकै लागि खेतमा रातभरि जाग्राम बस्ने गरेका छन् । छाडा पशु चौपाया यहीँका पशु पालक किसानहरूबाटै उत्पन्न भएको समस्या हो । धेरैजसो छाडा चौपाया राजमार्ग क्षेत्रमै बस्ने गरेकोले तिनका कारण दुर्घटना पनि हुने गरेको छ ।
