बेलौरी युवा मञ्च जापानले चौथो अधिवेशनबाट नयाँ कार्यसमिति चयन गरेको छ । कञ्चनपुर जिल्लाको बेलौरीमा स्थायी बसोबास भई विभिन्न पेसा व्यवसायका लागि हाल जापानमा रहेका युवाहरूको संस्था बेलौरी युवा मञ्चले भागिरथ न्यौपानेको अध्यक्षतामा ११ सदस्यीय नयाँ कार्यसमिति चयन गरेको हो । सर्वसम्मत निर्वाचित कार्यसमितिको वरिष्ठ उपाध्यक्षमा राम कृष्ण सापकोटा, उपाध्यक्षमा अञ्जु रेग्मी, महासचिवमा जीवन ढकाल, सचिवमा रामचन्द्र गौतम र कोषाध्यक्षमा ऋषि रिजाल चयन हुनुभएको । साथै अन्य कार्यसमिति सदस्यहरूमा प्रेम खरेल (संयोजक सदस्य), शङ्कर ढकाल (संयोजक सदस्य), अर्जुन पाण्डेय (संयोजक सदस्य), नेत्र रेग्मी र सीता (कल्पना) ढकाल न्यौपाने रहनुभएको छ । आफू जन्मे हुर्केको ठाउँमा केही भए पनि सहयोग गर्नका लागि बेलोरीका युवाहरूको पहलमा सन् २०१६ मा स्थापना भएको यस मञ्चले कोभिडको समयमा बेलोरीमा खाद्यान्न लगायत त्यहाँको स्वास्थ्य चौकीमा अक्सिजन मेसिनका लागि सहयोग सहित कालिका मन्दिरमा मूर्ति स्थापनाका लागि सहयोग होस् या अन्य समयमा विभिन्न आर्थिक सहयोग गर्दै आएको नवनिर्वाचित अध्यक्ष न्यौपानेले जानकारी दिनुभएको छ । उक्त मञ्चमा जापानमा रहनु हुने बेलौरीका करिब ८० जना सदस्य रहनुभएको छ ।
