कञ्चनपुर क्षेत्र नम्बर १ मा एकै दिन प्रदेश सरकारका विभिन्न ६ वटा योजनाको शिलान्यास

विकास निर्माण

गृहपृष्ठ
विकास निर्माण
कञ्चनपुर क्षेत्र नम्बर १ मा एकै दिन प्रदेश सरकारका विभिन्न ६ वटा योजनाको शिलान्यास

कञ्चनपुर क्षेत्र नम्बर १ मा एकै दिन प्रदेश सरकारका विभिन्न ६ वटा योजनाको शिलान्यास

बिहीबार, भदौ ८, २०७९NB Media Network

कञ्चनपुर, ०८ भदौ । कञ्चनपुर क्षेत्र नम्बर १ मा एकै दिन प्रदेश सरकारका विभिन्न ६ वटा योजनाको शिलान्यास गरिएको छ । बेलडाँडी, बेलौरी र पुनर्वासका विभिन्न गाउँबस्तीमा पुल र सडकका योजनाको शिलान्यास गरिएको हो । सुदूरपश्चिम प्रदेश सरकार भौतिक पूर्वाधार मन्त्रालय अन्तर्गतको पूर्वाधार विकास कार्यालय कञ्चनपुर मार्फत सञ्चालित हुने पुल र सडकका योजनाको शिलान्यास गरिएको छ ।

पूर्वाधार विकास कार्यालय कञ्चनपुरका सूचना अधिकारी इन्जिनियर हेमराज भट्टले ठेक्का सम्झौता भइसकेका ३ सडक र ३ पुलका योजना कार्यान्वयनका लागि शिलान्यास गरिएको बताउनु भयो । बुधबार एकै दिन भौतिक पूर्वाधार विकास राज्यमन्त्री कुलवीर चौधरी र प्रदेश सभा सदस्य तथा पूर्व आर्थिक मामिला मन्त्री तारा लामा तामाङले स्थानीय जनप्रतिनिधिको उपस्थितिमा योजनाको शिलान्यास गर्नु भएको हो ।

पूर्वाधार विकास कार्यालय कञ्चनपुरका सूचना अधिकारी इन्जिनियर भट्टले बेलडाँडीको चौधर नदीमा पक्की पुल, बेलडाँडी ३ र बेलौरी ९ जोड्ने कमरी किचाई खोलामा पक्की पुल र पुनर्वास नगरपालिका १० कमैया नालाका पक्की पुल निर्माण हुने बताउनु भयो । यस्तै बेलौरी नगरपालिका ६ रिछाहादेखि विद्युत् वितरण केन्द्र, गोकुलपुर हुँदै कोटिहोम सडक, पुनर्वास नगरपालिका ४ कोटिहोमदेखि नगरपालिका भवनसम्मको सडक र विचफाँटासम्मको सडक कालोपत्रे हुने छन् ।

पूर्व आर्थिक मामिला मन्त्री तथा प्रदेश सभा सदस्य तामाङले लमैया नाला, विचफाँटा सडक र कोटिहोम सडकको शिलान्यास गर्दै आफ्नो पहलमा उक्त आयोजना निर्माण हुने बताउनु भएको छ । त्यस्तै भौतिक पूर्वाधार राज्यमन्त्री कुलवीर चौधरीले बेलडाँडीको चौधर नदीमा पक्की पुल, कमरीमा पक्की पुल र रिछाहा–कोटिहोम सडकको शिलान्यास गर्दै प्रदेश सरकारबाट तीनै पालिकामा सञ्चालित हुने योजना समयमै कार्यान्वयन गर्न निर्माण कम्पनीलाई आग्रह गर्नुभएको छ ।

प्रकाशित मिति: बुधबार, भदौ ८, २०७९