घरदैलो मै कोरोना विरुद्धको खोप सेवा

स्वास्थ्य

गृहपृष्ठ
स्वास्थ्य
घरदैलो मै कोरोना विरुद्धको खोप सेवा

घरदैलो मै कोरोना विरुद्धको खोप सेवा

आइतबार, चैत २०, २०७८NB Media Network

हरिश्चन्द्र बाग, कञ्चनपुर, २० चैत्र । कोरोना भाइरस विरुद्धको खोप सेवालाई प्रभावकारी बनाउन र लक्षित उमेर समूहका हरेक नागरिकलाई खोप सेवा उपलब्ध गराउन कञ्चनपुरमा घरदैलो मै कोरोना विरुद्धको खोप सेवा प्रदान गर्न लागिएको छ । हाल भीमदत्त नगरपालिका वडा नम्बर ९ का विभिन्न बस्तीहरू तथा घरदैलोमै गई कोरोना विरुद्धको खोप सेवा दिने कार्य जारी रहेको छ ।

भीमदत्त नगरपालिका, निड्स नेपाल, लुथरन वर्ल्ड रिलिफ (एलडब्लुआर), बागेश्वरी असल शासन क्लब (बास) र युनिसेफको सहयोगमा भीमदत्त नगरपालिका वडा नम्बर ९ मा कोरोना भाइरस विरुद्धको खोप अभियान जारी रहेको छ । गाउँ बस्ती तथा घरदैलोमै पुगी लक्षित उमेर समूहका सबै नागरिकलाई खोप सेवा दिन थालेपछि सेवाग्राहीहरूले सहज महसुस गरी खुसी व्यक्त गर्नु भएको छ । केही नागरिकहरूमा कोरोना विरुद्धको खोप सम्बन्धी गलत अफवाह र भ्रम समेत रहेकोमा उक्त अभियान मार्फत सबैलाई वास्तविक जानकारी दिइएको छ ।

घरायसी कार्य व्यस्तता, जनचेतनाको अभाव र अशक्तताले गर्दा खोप केन्द्र तथा स्वास्थ्य संस्थासम्म जान नसकेका र बाँकी आवश्यक मात्राको खोप लगाउने समय पुगेका नागरिकहरूलाई घुम्ती शिविर मार्फत खोप सेवा प्रदान गर्ने कार्य भइरहेको भीमदत्त नगरपालिका वडा नम्बर ९ का वडाध्यक्ष राम नाथले बताउनु भयो । उक्त वडामा ब्रह्मदेव सहरी स्वास्थ्य केन्द्रका प्रमुख गोविन्द धामीको नेतृत्वमा स्वास्थ्यकर्मीसँगै महिला स्वास्थ्य स्वयंसेविका, स्थानीय जनप्रतिनिधि तथा सहयोगी सङ्घसंस्थाहरूका कर्मचारीको टोली परिचालन गरी खोप सेवासँगै जनचेतना समेत प्रदान गरिएको छ ।

लक्षित उमेर समूहका कुनै पनि नागरिक कोरोना विरुद्धको खोप सेवाबाट वञ्चित नहोउन् भन्ने उद्देश्यले सञ्चालन गरिएको अभियानले सार्थकता पाएको छ । दैनिक औसत ५० जनालाई गरी ३०० जनालाई कोरोना विरुद्धको खोप प्रदान गरिएको रिकोभर परियोजनाका कार्यक्रम संयोजक विनोद सिंह कडाराले जानकारी दिनुभयो । रिकोभर परियोजनाले कञ्चनपुरका भीमदत्त नगरपालिका, कृष्णपुर नगरपालिका र पुनर्वास नगरपालिकामा विभिन्न कार्यक्रम लागु गरेको छ । यसपछि भीमदत्त नगरपालिका भित्रका अन्य विकट बस्तीमा समेत खोप अभियान सञ्चालन गरिने र परियोजना लागु भएका अन्य पालिकामा समेत उक्त अभियान विस्तार गर्ने योजना रहेको बताइएको छ ।