गेटामा शहीद दशरथ चन्द स्वास्थ्य विज्ञान विश्वविद्यालय सञ्चालन गर्ने सरकारको निर्णय

स्वास्थ्य

गृहपृष्ठ
स्वास्थ्य
गेटामा शहीद दशरथ चन्द स्वास्थ्य विज्ञान विश्वविद्यालय सञ्चालन गर्ने सरकारको निर्णय

गेटामा शहीद दशरथ चन्द स्वास्थ्य विज्ञान विश्वविद्यालय सञ्चालन गर्ने सरकारको निर्णय

आइतबार, माघ २९, २०७९NB Media Network

सरकारले कैलालीको गेटामा शहीद दशरथ चन्द स्वास्थ्य विज्ञान विश्वविद्यालय सञ्चालन गर्ने निर्णय गरेको छ । आइतबार बसेको मन्त्रिपरिषद् बैठकले गेटामा सरकारी लगानीमा निर्माण भएको संरचनामा स्वास्थ्य विज्ञान सम्बन्धी विशिष्टीकृत विश्वविद्यालयको रूपमा शहीद दशरथ चन्द राष्ट्रिय स्वास्थ्य विज्ञान विश्वविद्यालय स्थापना तथा सञ्चालन गर्नु उपयुक्त हुने निर्णय गरेको हो ।

अब शिक्षा, विज्ञान तथा प्रविधि मन्त्रालयले यो विश्वविद्यालय सम्बन्धी विधेयक तर्जुमा गर्नेछ । उक्त विधेयक सांसदबाट पारित भएपछि विश्वविद्यालय स्थापना हुनेछ । गेटा मेडिकल कलेज सञ्चालनका लागि पूर्वाधार निर्माण विकास समितिले २८ वटा संरचना बनाएको छ भने २३ वटा निर्माणाधीन छन् । निर्माणाधीनमध्ये १२ वटा संरचनाको काम आगामी असारमा सम्पन्न हुने पूर्वाधार विकास समितिले जनाएको छ । यी संरचना निर्माण गर्दा ५ अर्ब ४० करोड रुपैयाँ खर्च भइसकेको छ ।

६०० शय्याको अस्पताल र मेडिकल कलेज सञ्चालन गर्ने लक्ष्यसहित कैलालीको गेटामा निर्माण भएको संरचना दुई वर्षदेखि अलपत्र थियो । सरकारले गेटा मेडिकल कलेजमा शिक्षण अस्पताल सञ्चालनका लागि चालु आर्थिक वर्षमा ४५ करोड बजेट पठाएको छ । स्वास्थ्य तथा जनसङ्ख्या मन्त्रालयले २०७९ असोज १० गतेका दिन राष्ट्रिय ट्रमा सेन्टर काठमाडौँमा कार्यरत डा. प्रमोद जोशीलाई गेटा मेडिकल कलेजको अस्पताल निर्देशकका रूपमा खटाएको छ । यद्यपि हालसम्म अस्पताल पनि सञ्चालन भएको छैन ।

प्रस्तावित मेडिकल कलेजलाई चिकित्सा विश्वविद्यालय बनाउन एमालेका निवर्तमान सांसद डा. दीपक प्रकाश भट्टले गत वर्षदेखि अभियान सञ्चालन गर्नु भएको थियो । सुदूरपश्चिम प्रदेशमा मेडिकल कलेज, प्रतिष्ठान सहित स्वास्थ्य क्षेत्रका अन्य जनशक्ति उत्पादन गर्ने संस्था नभएकाले उहाँले विश्वविद्यालय बनाउने अभियान थालनी गर्नु भएको थियो । कञ्चनपुर निर्वाचन क्षेत्र क्षेत्र नं. ३ का निवर्तमान सांसद भट्टले अभियान सञ्चालन गरेपछि गत वर्ष संसदीय उपसमिति गठन भएर विश्वविद्यालय बनाउन सुझाव दिइएको थियो । निवर्तमान सांसद भट्टको अगुवाइमा केही दिन अघि सुदूरपश्चिम प्रदेशका सबै राजनीतिक दलका सांसदहरूले विश्वविद्यालयका लागि सरकारलाई दबाब दिने निर्णय समेत गरेको थियो ।

प्रकाशित मिति: आइतबार, माघ २९, २०७९