📣उच्च सतर्कताका लागि अनुरोध !🚨विभाग भन्छ, 'कञ्चनपुर र कैलालीका होचा भू-भागमा बाढीको उच्च जोखिम'

पर्यावरण

गृहपृष्ठ
पर्यावरण
📣उच्च सतर्कताका लागि अनुरोध !🚨विभाग भन्छ, 'कञ्चनपुर र कैलालीका होचा भू-भागमा बाढीको उच्च जोखिम'

📣उच्च सतर्कताका लागि अनुरोध !🚨विभाग भन्छ, 'कञ्चनपुर र कैलालीका होचा भू-भागमा बाढीको उच्च जोखिम'

सोमबार, असार १६, २०८२NB Media Network

हरिश्चन्द्र बाग, कञ्चनपुर, १६ असार । असार १६ गते सोमबार बिहान कञ्चनपुर र कैलाली जिल्लामा भारी वर्षा पछि बाढीको जोखिम उच्च बनेको छ । पछिल्लो २४ घण्टा (आइतबार बिहान १० बजेदेखि सोमबार बिहान १० बजेसम्म) मा कञ्चनपुरको बेलौरीमा अति भारी पानी (२०१ मिलिमिटर) परेको छ । त्यस वरीपरीका क्षेत्रमा पनि धेरै भारी पानी परेको छ । पछिल्ला केही घण्टादेखि लगातार वर्षा भइरहेकाले महाकाली, मोहना, मछेली, दोदा, स्याली, चौधर लगायत नदी तथा खोलाहरूमा पानीको सतह उल्लेख्य रूपमा बढ्न थालेको छ । जल तथा मौसम विज्ञान विभागका अनुसार कञ्चनपुरका अधिकांश स्थानमा पछिल्लो तीन घण्टामा मध्यमदेखि भारी वर्षा मापन गरिएको छ । खासगरी कृष्णपुरको खल्लागोठ र बेलौरीको शान्तिपुर आसपासका क्षेत्रहरूमा बाढीको विशेष जोखिम रहेको बताइएको छ । नदी तटीय क्षेत्र र डुबान भइरहने भू-भागमा रहनुहुनेहरूलाई सुरक्षित स्थानमा सर्न र बेलुकासम्म विशेष ध्यान दिन विभागले अनुरोध गरेको छ ।

यसैबीच, जिल्ला प्रशासन कार्यालयले पनि सतर्कता कायम गर्न सूचना जारी गर्दै नदी तथा खोलानालाहरूको जलसतह सतर्कता तह आसपास पुगेको र अझै बढ्दो क्रममा रहेको उल्लेख गरेको छ । मौसमविद्हरूका अनुसार आगामी केही घण्टासम्म निरन्तर वर्षा हुने सम्भावना रहेकोले तटीय क्षेत्रका बासिन्दाहरूलाई पूर्वतयारीसहित उच्च सतर्कता अपनाउन सुझाव दिइएको छ । महाकाली नदीमा पनि पानीको बहाव उल्लेख्य रूपमा बढ्न सक्ने जनाइएको छ । सुरक्षा निकायहरू तयारी अवस्थामा छन् । यति बेला जनमानसमा सतर्कता, सहकार्य र जानकारीको सशक्त सञ्जाल आवश्यक छ ।