तर्कराज भट्ट, डडेलधुरा, ०९ जेठ । डडेलधुरा स्थित शिव शिखर बहुउद्देश्यीय सहकारी संस्थामा रकम जम्मा गरेका बचतकर्ता सम्बन्धित कागजात सहित जिल्ला प्रहरी कार्यालयमा जाहेरी दिन पुगेका छन् । सहकारीले बचतकर्तालाई ठगेको, रकम फिर्ता नगरेको लगायतको जाहेरी सहित बचतकर्ताहरू जिल्ला प्रहरी कार्यालयमा पुगेका हुन् । जिल्ला प्रहरी कार्यालयले सो सहकारीमा ठगी भएको, रकम फिर्ता नभएको, रकम हिनामिना लगायतको विषयमा जाहेरी दरखास्त पेस गर्न बचतकर्ताका लागि गत बिहीबार सार्वजनिक सूचना जारी गरेको थियो ।
जिल्ला प्रहरी कार्यालय डडेलधुराका प्रहरी प्रवक्ता प्रहरी निरीक्षक उमाकान्त जोशीले आज (मंगलबार) सम्म ६ सय ८० बचतकर्ताले प्रहरीमा सम्बन्धित कागजात सहित जाहेरी बुझाएको जानकारी दिनुभयो । ‘जिल्ला प्रहरी कार्यालयमा आज (मंगलबार) बेलुकीसम्म आएका ६ सय ८० जना बचतकर्ताको कागजातको आधारमा १२ करोड ७४ लाख रुपैयाँ फिर्ता नपाएको जाहेरी परेको छ ।’ उहाँले भन्नुभयो । उहाँका अनुसार सङ्कलित कागजातका आधारमा प्रहरीले अनुसन्धान अघि बढाउने छ । शिव शिखर बहुउद्देश्यीय सहकारीको डडेलधुरा शाखाबाट मात्रै ४० करोड बढी रुपैयाँ निक्षेप सङ्कलन गरेको पाइएको छ । यस सहकारीमा डडेलधुरामा मात्रै झण्डै ६ हजार बचतकर्ता रहेका छन् ।
