रूढीवादी परम्परा अनुसार धामीझाँक्रीबाट झारफुक गराउँदा बिरामी महिलाको मृत्यु

खास खबर

गृहपृष्ठ
खास खबर
रूढीवादी परम्परा अनुसार धामीझाँक्रीबाट झारफुक गराउँदा बिरामी महिलाको मृत्यु

रूढीवादी परम्परा अनुसार धामीझाँक्रीबाट झारफुक गराउँदा बिरामी महिलाको मृत्यु

शनिबार, वैशाख ३, २०७९NB Media Network

हरिश्चन्द्र बाग, कञ्चनपुर, ०३ बैशाख । रूढीवादी परम्परा अनुसार धामीझाँक्रीबाट झारफुक गराउँदा कञ्चनपुरमा एक बिरामी महिलाको मृत्यु भएको छ । अस्वस्थ हुँदा उपचारका लागि राम्रो अस्पतालमा नगई केही दिनदेखि धामीझाँक्रीबाट झारफुक गराउँदा कञ्चनपुरको वेदकोट नगरपालिका वडा नम्बर ६ बस्ने ४३ वर्षीया रन्चुला साउँदको मृत्यु भएको हो । “रूढीवादी परम्परा र धामीझाँक्रीका कारण एकल महिला रन्चुला साउँदले ज्यान गुमाउनु प¥यो । यो जघन्य अपराधको घटना हो । उक्त घटनाको सत्य तथ्य छानबिन गरी दोषी माथि कडा भन्दा कडा कारबाही होस् र पीडित पक्षले न्याय पाओस् ।” घटनाबारे जानकारी दिँदै वेदकोट नगरपालिकाका नगर प्रमुख अशोक कुमार चन्दले भन्नुभयो ।

भीमदत्त नगरपालिका वडा नम्बर ७ हल्दुखाल बस्ने धामीझाँक्री धर्मानन्द भट्ट र भीमदत्त नगरपालिका वडा नम्बर १ बाराकुण्डा बस्ने धामीझाँक्री नारायण दत्त भट्टको नेतृत्वमा मुसेपानी स्थित स्थानीय कमला साउँदको घरमा जघन्य अपराधको घटना भएको नगर प्रमुख चन्दले बताउनु भयो । मृतक महिलाको शव परीक्षणका लागि महाकाली प्रादेशिक अस्पताल महेन्द्रनगरमा राखिएको छ । घटनाबारे अनुसन्धानका लागि प्रहरीले ७ जनालाई नियन्त्रणमा लिएको जिल्ला प्रहरी कार्यालय कञ्चनपुरका प्रवक्ता एवं प्रहरी नायव उपरीक्षक चक्र बहादुर शाहले जानकारी दिनुभयो ।