नेपाल सरकारका निर्णयहरू

संघीय सरकार

गृहपृष्ठ
संघीय सरकार
नेपाल सरकारका निर्णयहरू

नेपाल सरकारका निर्णयहरू

मंगलबार, जेठ २४, २०७९NB Media Network

केशव ढुङ्गाना, काठमाडौँ । सरकारले हप्तामा दुई दिन सार्वजनिक बिदा दिने निर्णय फिर्ता लिएको छ । हिजो बसेको मन्त्रीपरिषद् बैठकका निर्णय सार्वजनिक गर्न आज सञ्चार तथा सूचना प्रविधि मन्त्रालयमा आयोजित पत्रकार सम्मेलनमा गृहमन्त्री बालकृष्ण खाँणले परीक्षणका रूपमा लागु भएको दुई दिन सार्वजनिक बिदा दिने निर्णय असार १ गतेदेखि लागु हुने गरी खारेज गरेको जानकारी दिनुभयो । मन्त्री खाँणले हप्तामा दुई दिन सार्वजनिक बिदा दिँदा शिक्षण संस्था, अस्पताल लगायतको सेवा प्रवाहमा समस्या देखिएको हुनाले निर्णय फिर्ता लिएको बताउनुभयो ।

बैठकले विश्व बैङ्कबाट हरित उत्थानशील र समावेशी विकासका लागि प्राप्त हुने एक सय मिलियन अमेरिकी डलर अर्थात् करिब १२ अर्ब रुपैयाँ सहुलियतपूर्ण ऋण सहायता लिन वार्ता टोली गठन गर्ने निर्णय गरेको छ । यसै गरी बैठकले नेपाल प्रहरी र प्रदेश प्रहरी कार्य सञ्चालन सुपरिवेक्षण र समन्वय ऐन २०७६, सामाजिक सुरक्षा ऐन २०७५ लाई संशोधन गर्न बनेको विधेयक र तेजाब तथा अन्य घातक रासायनिक पदार्थको नियमनका सम्बन्धमा व्यवस्था गर्न बनेको विधेयकलाई सङ्घीय संसद् समक्ष पेस गर्न स्वीकृति दिने निर्णय गरेको छ । मन्त्रिपरिषद् बैठकले हातहतियार खरखजाना एघारौँ संशोधन नियमावली २०७९ स्वीकृत गर्ने तथा मानव अङ्ग प्रत्यारोपण विकास समिति गठन तेस्रो संशोधन आदेश २०७९ स्वीकृत गर्ने निर्णय गरेको छ ।

यस्तै बैठकले प्रहरी नायव महानिरीक्षकहरू उत्तम राज सुवेदी, अरुण कुमार बिसी, दिनेश लोहनी, मुकुन्दराज आचार्य र पूजा सिंहलाई प्रहरी अतिरिक्त महानिरीक्षक पदमा बढुवा गर्ने, सशस्त्र प्रहरी नायव महानिरीक्षक चन्द्रप्रकाश गौतमलाई सशस्त्र प्रहरी महानिरीक्षक पदमा बढुवा गर्ने, व्यापार तथा निकासी प्रवर्द्धन केन्द्रको कार्यकारी निर्देशक पदमा शरदविक्रम राणालाई नियुक्त गर्ने, नेपाल वायु सेवा निगमका महाप्रबन्धक तथा सञ्चालक सदस्य डिमप्रसाद पौडेललाई पदबाट हटाउने लगायतका निर्णयहरू गरेको गृहमन्त्री बालकृष्ण खाँणले बताउनुभयो ।

प्रकाशित मिति: मंगलबार, जेठ २४, २०७९