रोग लाग्न थालेपछि पशुपालन पेसाबाटै पलायन हुँदै किसान

कृषि

गृहपृष्ठ
कृषि
रोग लाग्न थालेपछि पशुपालन पेसाबाटै पलायन हुँदै किसान

रोग लाग्न थालेपछि पशुपालन पेसाबाटै पलायन हुँदै किसान

बुधबार, जेठ १०, २०८०NB Media Network

तर्कराज भट्ट, डडेलधुरा, १० जेठ । पशु वस्तुमा थरी थरीका रोग लाग्न थालेपछि डडेलधुराका किसान पशुपालन पेसाबाटै पलायन हुन थालेका छन् । डडेलधुराको आलितालका नागरिकले कृषि र पशुपालनलाई मुख्य पेसा बनाएका छन् । तर पछिल्लो केही समय यता पशु वस्तुमा बेलाबेलामा विभिन्न महामारी फैलिएपछि सोचे जस्तो आम्दानी लिन नसकिएको स्थानीय किसानको भनाइ छ । दुई दशकदेखि बाख्रा पालन गर्दै आएका आलिताल गाउँपालिका–२ काफलीका किसान चेतबहादुर मल्लले यस पटक नराम्रोसँग क्षति व्यहोरेपछि बाख्रा पाल्नै छोडेको बताए ।

जिल्ला सदरमुकाममा रहेको भेटेरिनरी अस्पतालबाट सेवा लिन टाढा पर्ने र वडामा रहेको पशु सेवा केन्द्रमा रहेका प्राविधिकहरू दक्ष नहुने किसानहरूको भनाइ छ । अर्का किसान शान्तिप्रसाद भट्टले बाख्रा मरेर खोर रित्तै हुँदा समेत प्राविधिक सल्लाह र उपचार नपाएको गुनासो गरे । आम्दानीको मुख्य स्रोत नै बाख्रा पालनलाई बनाएका स्थानीय किसान अहिले धमाधम पलायन भइरहेका छन् । आवश्यक पर्दा पशु चिकित्सकको सेवा, औषधी, दाना नपाउने जस्ता समस्या र स्थानीय तहले अनुदानमा कन्जुस्याइँ गर्दा पनि किसान पीडित बनेका हुन । भेटेरिनरी अस्पताल तथा पशु सेवा विज्ञ केन्द्र डडेलधुराका प्रमुख देवराज भट्टले पर्याप्त जनशक्ति नहुँदा किसानले चाहे जस्तो छिटो छरितो सेवा दिन नसकिएको बताए । आलिताल गाउँपालिका भित्र २० ओटा बाख्रा फर्म दर्ता छन् । यो बाहेक एक सयभन्दा बढी किसान बाख्रा पालन व्यवसायमा आबद्ध छन् । बोयर, बारबेरी, जमुनापारी, खरी लगायत जातका बाख्रा पाल्दै आएका स्थानीय किसान बेलाबेलामा बाख्रामा महामारी रोग देखिएपछि हतोत्साहित बनेका छन् ।

प्रकाशित मिति: बुधबार, जेठ १०, २०८०