हरिश्चन्द्र बाग, कञ्चनपुर, १४ मङ्सिर । जीवनका लागि गीता ज्ञान अभियान नेपालको आयोजना तथा शिक्षा विकास तथा समन्वय इकाई कञ्चनपुरको सहयोगमा सञ्चालित जिल्ला स्तरीय गीता ज्ञान परीक्षाको नतिजा सार्वजनिक गरिएको छ । शनिबारका दिन ग्लोबल एकेडेमीमा सम्पन्न उक्त परीक्षामा कञ्चनपुरका नौ वटै पालिकाबाट सामुदायिक, संस्थागत तथा गुरुकुल गरी ४२ विद्यालयका ५३२ जना विद्यार्थीहरूको सहभागिता रहेको थियो ।
परीक्षामा शिक्षा विकास तथा समन्वय इकाई कञ्चनपुरका प्रमुख लक्ष्मण गिरी पर्यवेक्षक र अभियानका अभियन्ता पुरुषोत्तम भट्ट केन्द्राध्यक्षको रूपमा रहनु भएको थियो । परीक्षा सुव्यवस्थित रूपमा सञ्चालन गर्न १० जना सहायक केन्द्राध्यक्ष, ३१ जना निरीक्षक तथा ६ जना कार्यालय सहयोगी परिचालन गरिएको थियो । परीक्षा सम्पन्न भएको डेढ घण्टामै पहिलो चरणको नतिजा सार्वजनिक गरिएको थियो भने प्राप्ताङ्कका आधारमा १९ जना विद्यार्थीहरूलाई दोस्रो चरणका लागि छनौट गरिएको थियो ।
पहिलो चरणमा योगाचार्य सुरेन्द्र ओझाद्वारा लिखित ‘समसामयिक शिक्षामा गीता’ पुस्तकबाट प्रश्नहरू सोधिएका थिए भने दोस्रो चरणमा सोही पुस्तकसँगै योगाचार्य ओझाद्वारा लिखित ‘गीतोत्सव’ पुस्तकका प्रश्नहरू समावेश गरिएका थिए । दोस्रो चरणमार्फत अन्तिम स्थान निर्धारण गरिएको थियो । जिल्ला स्तरीय प्रतिस्पर्धामा महेन्द्रनगर माविकी छात्रा भावना जोशीले प्रथम स्थान हासिल गरेकी छन् । त्यस्तै, डायमण्ड पब्लिक एकेडेमीकी छात्रा ज्योति नेपाली र ग्लोबल एकेडेमीका छात्र रूपेश गिरीले संयुक्त रूपमा दोस्रो स्थान हासिल गरे । वात्सल्य एकेडेमीकी छात्रा बिनिसा काफ्ले तृतीय स्थानमा रहिन् भने ग्लोबल एकेडेमीका भुपेश गिरी र विनीत उपाध्यायले संयुक्त रूपमा चतुर्थ स्थान सुरक्षित गरे ।
उत्कृष्ट १० मा पर्न सफल १० जना विद्यार्थीलाई गीता जयन्तीको अवसर पारेर भोलि मङ्सिर १५ गते बिहान ११ बजे ग्लोबल एकेडेमी महेन्द्रनगरमा पुरस्कार वितरण गरिने बताइएको छ । जीवनका लागि गीता ज्ञान अभियानका संस्थापक संयोजक डा. हरिचन्द्र कमलीको प्रमुख आतिथ्यमा हुने उक्त समारोहमा प्रथम स्थान प्राप्त विद्यार्थीलाई रु २० हजार, द्वितीयलाई रु १५ हजार, तृतीयलाई रु १० हजार, चतुर्थलाई रु ५ हजार तथा उत्कृष्ट १० भित्रका अन्य विद्यार्थीहरूलाई जनही रु १ हजार नगदसहित प्रमाणपत्र प्रदान गरिने बताइएको योगाचार्य सुरेन्द्र ओझाले जानकारी दिनुभएको छ । विजेता विद्यार्थीहरूको हौसला बढाउन तथा कार्यक्रमलाई गीतोत्सवको रूपमा मनाउन सबै विद्यालयका अध्यक्ष, प्रिन्सिपल, अभिभावक तथा परिवारका सदस्यहरूलाई समारोहमा उपस्थित रहन आयोजकले हार्दिक निमन्त्रणा गरेको छ ।
