हरिश्चन्द्र बाग, कञ्चनपुर, ११ पुस । कञ्चनपुर सहित पश्चिम तराईमा बाक्लो हुस्सु लाग्न थालेको छ । विगतका वर्षहरूमा मङ्सिरदेखि नै हुस्सु लाग्ने गरेको भए पनि यस वर्ष भने पुस दोस्रो सातादेखि मात्रै बाक्लो हुस्सु लाग्न थालेको छ । हुस्सु लागेसँगै चिसो बढेपछि बिहानी समयमा यहाँका नागरिकहरू अत्यावश्यक कामकाज बाहेक घरबाहिर देखिँदैनन् । यद्यपि बिहानी समयमै कामकाजका लागि घरबाहिर निस्कने मजदुर तथा अति विपन्न परिवार भने चिसोले प्रभावित हुन थालेका छन् । हुस्सु लागेसँगै चिसोका कारण मानव तथा पशु चौपायाको स्वास्थ्यमा विशेष ख्याल गर्न चिकित्सकहरूको सुझाव छ ।
