हरिश्चन्द्र बाग, कञ्चनपुर, २९ फागुन । कञ्चनपुरको लालझाडीमा रक्तदान कार्यक्रम गरिएको छ । लालझाडी गाउँपालिका स्वास्थ्य शाखाको समन्वय तथा राना कला संस्कृति संरक्षण मञ्चको आयोजनामा सोमबार गरिएको रक्तदान कार्यक्रममा २५ जनाले रक्तदान गरेको बताइएको छ ।
चेतनाको अभावमा विगतमा आफ्नै घर परिवारका सदस्यहरूलाई नै रक्तदान गर्न पनि हिचकिचाहट तथा डर मान्ने समुदायका नागरिकहरूलाई रक्तदानको महत्त्व बुझाउने र चेतना दिने गरी रक्तदान कार्यक्रमको आयोजना गरिएको आयोजकले जनाएको छ । खखडेहरा महोत्सवको पूर्व सन्ध्यामा आयोजित रक्तदान कार्यक्रमले उक्त समुदायका नागरिकहरूलाई अब रक्तदान गर्नुपर्छ भन्ने चेतना अभिवृद्धि भएको कार्यक्रम संयोजक अमर रानाको भनाइ छ ।
यसैबिच फागुन ३० र चैत १ गतेका दिन लालझाडीको नन्दगाउँस्थित खेल मैदानमा आयोजना गरिने खखडेहरा महोत्सवको सम्पूर्ण तयारी पूरा भएको संयोजक रानाले जानकारी दिनुभयो । लालझाडी गाउँपालिका कार्यालयको समन्वय तथा आर्थिक सहयोगमा राना कला संस्कृति संरक्षण मञ्चले आयोजना गर्न लागेको महोत्सवको माध्यमबाट कला, संस्कृतिको संरक्षण प्रवर्द्धनसँगै मनोरञ्जन प्रदान गर्नुका साथै विशेष गरी रानाथारु समुदायमा शैक्षिक क्षेत्रमा देखिएका विकृतिलाई सुधार गर्न प्रेरित गर्ने उद्देश्य रहेको बताइएको छ ।
“अगर भविष्य बनान हए इच्छा, तओ आजस् देओ गुणस्तरीय औ नैतिक शिक्षा” भन्ने मूल नाराका साथ दोस्रो खखडेहरा महोत्सव २०७९ आयोजना गर्न लागिएको हो । कार्यक्रममा हुने मुख्य गतिविधिहरूमा रानाथारु सांस्कृतिक झाँकी प्रदर्शन, विभिन्न कलाकारद्वारा नृत्य तथा गायन, सामाजिक कुरीति विरुद्ध जनचेतनामूलक नाटक प्रस्तुत, रानाथारू परिकार, स्थानीय व्यवसायका स्टल पसलहरू सञ्चालन, शैक्षिक ÷ सामाजिक विकासका लागि नेतृत्वद्वारा प्रतिबद्धता राखिने जनाइएको छ ।
रानाथारू कला संस्कृतिको संरक्षण तथा खखडेहरा पर्व प्रवर्द्धन, स्थानीय उत्पादनको बजारीकरणको सम्भावनाको खोजी, स्थानीय कलाकार र प्रतिभा पहिचानको अवसर, सांस्कृतिक पर्यटनको सम्भावनाको खोज, शैक्षिक विकासका लागि नेतृत्वलाई ध्यानाकर्षण, रानाथारू समुदायको मौलिक पर्वमा मनोरञ्जन प्रदान, युवाहरूलाई सामाजिक सचेतना तथा मनोबलको विकास शिक्षाको विकासका निम्ति व्याप्त विकृति विरुद्ध सचेतना फैलाई समुन्नत समुदायको खोजी आदि कार्यक्रमका अपेक्षित उपलब्धिहरू रहने आयोजकको दाबी छ ।
सामाजिक मान्यता अनुसार खखडेहरा पर्वको मूल मर्म नै होरी औपचारिक बिदाइसँगै समाजमा रोग व्याधि महामारी लगायत प्रेत आत्माहरूलाई प्राचीन मान्यता अनुसार गाउँवासीहरू संयुक्त रूपमा कुट्ने (खखडेहरा कुटेर फुटाउने) प्रचलन छ र गलत तत्त्वको अन्त्य भएको मान्यता अनुरूप खुसीयाली मनाउने पर्वको रूपमा खखडेहरा रहेको छ । तर प्राचीन मान्यता त्यो रहे पनि वर्तमान समयमा प्रायः रानाथारू समुदायको गलत तत्त्वको रूपमा विभिन्न विकृतिहरू छरपस्ट रूपमा रहेका छन् । तिनलाई सुधार्ने अभियानका रूपमा पनि यो महोत्सव सञ्चालन गर्न गइरहेको आयोजकको दाबी छ ।
रानाथारू समुदायको खखडेहरा पर्वको अवसरमा सुदूरपश्चिम प्रदेश सरकारले फागुन ३० गतेका दिन कञ्चनपुर र कैलाली जिल्लामा सार्वजनिक बिदा दिने निर्णय गरेको छ । कञ्चनपुर र कैलालीमा स्थायी बसोबास गर्ने रानाथारू समुदायले मनाउने खखडेहरा पर्वको अवसरमा राजपत्रमा चैत्र १ गते बिदा दिने भनिए तापनि सोलाई संशोधन गरी फागुन ३० गतेका दिन बिदा दिने निर्णय भएको आन्तरिक मामिला तथा कानुन मन्त्रालयका प्रवक्ता विष्णु दत्त अवस्थीले जानकारी दिनुभएको छ ।