कञ्चनपुरबाट एकै दिन लागुऔषध सहित पाँच जना पक्राउ

खास खबर

गृहपृष्ठ
खास खबर
कञ्चनपुरबाट एकै दिन लागुऔषध सहित पाँच जना पक्राउ

कञ्चनपुरबाट एकै दिन लागुऔषध सहित पाँच जना पक्राउ

आइतबार, जेठ २३, २०७८NB Media Network

हरिश्चन्द्र बाग, कञ्चनपुर, २३ जेठ । कञ्चनपुरका विभिन्न क्षेत्रबाट एकै दिन लागुऔषध सहित पाँच जना पक्राउ परेका छन् । शनिबार मात्रै दोधाराचाँदनीबाट ३ जना र पुनर्वासबाट २ जनालाई लागुऔषध सहित पक्राउ गरिएको हो । सशस्त्र प्रहरी बल नेपाल नम्बर ३५ गण हेडक्वार्टर शैलेश्वरी कञ्चनपुर मातहत बोर्डर आउट पोष्ट पशुपतिटोल र नेपाल प्रहरीको अस्थायी प्रहरी पोष्ट झोलुङ्गेबाट खटिएको संयुक्त चेक प्वाइन्ट टोलीले दोधाराचाँदनी नगरपालिका वडा नम्बर ०१ मिलनचोकमा लागुऔषध सहित भारतीय नम्बर प्लेटको मोटरसाइकलमा सवार भारतको चम्पावत जिल्ला बनबासा बस्ने अन्दाजी २० वर्षीय अमन चन्दलाई पक्राउ गरी आवश्यक कानुनी कारबाहीको लागि इलाका प्रहरी कार्यालय दोधाराचाँदनीमा बुझाइएको सशस्त्र प्रहरी उपरीक्षक वीरेन्द्र बहादुर ऐरले जानकारी दिनुभयो । चन्दको साथबाट बरामद गरिएको लागु औषध खैरो हिरोइन ११ दशमलव ८७ ग्राम रहेको कञ्चनपुर प्रहरीले पुष्टि गरेको छ ।

त्यस्तै, दोधाराचाँदनी नगरपालिका वडा नम्बर ६ बस्ने १८ वर्षीय आदीप मगर र सोही ठाउँ बस्ने १८ वर्षीय सार्थक शर्मालाई ६० मिलिग्राम खैरो हिरोइन सहित पक्राउ गरिएको प्रहरीले जनाएको छ । उनीहरू दुवै जनाले प्रयोग गरेको सुप प्र ०२००३ प ३८८० नम्बरको मोटरसाइकल समेत बरामद गरिएको जिल्ला प्रहरी कार्यालय कञ्चनपुरका प्रहरी नायव उपरीक्षक अमरबहादुर थापा क्षेत्रीले बताउनुभयो । शनिबारनै कञ्चनपुरको पुनर्वास नगरपालिका वडा नम्बर ६ ङ गाउँ बस्ने २३ वर्षीय मनोज सुनार र कैलालीको गोदावरी नगरपालिका वडा नम्बर ४ बस्ने २३ वर्षीय तेज विकलाई समेत प्रहरीले पक्राउ गरेको छ । पुनर्वास स्थित सीमा इलाकाबाट पक्राउ परेका उनीहरूको साथबाट लागु औषध नाइट्रोभेट टेन ३४ ट्याब्लेट र स्पास्मोबोकप्लस १८ ट्याब्लेट बरामद गरिएको कञ्चनपुर प्रहरीले जनाएको छ ।