हरिश्चन्द्र बाग, कञ्चनपुर, १४ भदौ । कञ्चनपुरको पुनर्वास नगरपालिका वडा नम्बर ८ स्थित कङ्कडमा निर्मित सशस्त्र प्रहरी बल नेपाल बोर्डर आउट पोष्ट (बिओपी) को नयाँ भवन शनिबार एक विशेष समारोहका बीच उद्घाटन गरिएको छ । सुदूरपश्चिम प्रदेश सरकारको आन्तरिक मामिला तथा कानुन मन्त्रालयको रु. ४५ लाख बजेटमा बनेको भवनको उद्घाटन प्रदेश सरकारका आन्तरिक मामिला तथा कानुन मन्त्री हिरा सार्कीले गर्नुभयो ।
उद्घाटनपछि मन्तव्य दिँदै मन्त्री सार्कीले सशस्त्र प्रहरी बललाई “देशको सीमा सुरक्षा र शान्ति सुरक्षाको ढुकुटी” भन्दै नयाँ भवनले सुरक्षाकर्मीलाई थप सहज र सक्षम बनाउन मद्दत गर्ने विश्वास व्यक्त गर्नुभयो । उहाँले प्रदेश सरकार यस्ता संरचना विस्तारमा निरन्तर अग्रसर रहने प्रतिबद्धता पनि जनाउनुभयो ।
सशस्त्र प्रहरी बल सुदूरपश्चिमका प्रमुख सशस्त्र प्रहरी नायव महानिरीक्षक प्रदीप कुमार पालले सीमा सुरक्षा राष्ट्रको सार्वभौमिकता र अस्तित्वसँग जोडिएको विषय भएको उल्लेख गर्दै भन्नुभयो, “यस्ता बिओपी भवनहरूले सुरक्षाकर्मीलाई मात्रै होइन, आम स्थानीयवासीलाई समेत सुरक्षित र ढुक्क महसुस गराउँछन् । अझै बाँकी रहेका बिओपी भवन निर्माणमा प्रदेश सरकारको सहयोग अपरिहार्य छ ।”
उद्घाटन समारोहकै अवसरमा समाजसेवी तथा दानवीर सिद्धराज ओझालाई सम्मान गरिएको छ । ओझाले आफ्ना दिवङ्गत पिता स्व. शिव दत्त ओझा र आमा स्व. लक्ष्मी देवी ओझाको सम्झनामा कङ्कड बिओपी भवन निर्माणका लागि निःस्वार्थ भावले जग्गा दान गर्नुभएको थियो । उहाँको योगदानलाई उच्च मूल्याङ्कन गर्दै मन्त्रालयका तर्फबाट सम्मान पत्र मन्त्री हिरा सार्की र निमित्त सचिव आमोद दाहालले संयुक्त रूपमा हस्तान्तरण गर्नुभयो ।
सम्मान ग्रहण गर्दै सिद्धराज ओझाले भन्नुभयो, “पिता माताको सम्झनामा यो जग्गा दान गरेको हुँ । यो भवन सुरक्षाकर्मी र समुदाय दुवैका लागि उपयोगी बन्नु नै मेरो खुसी र सन्तोष हो ।” भवन हस्तान्तरण समारोहमा प्रदेश तथा स्थानीय तहका जनप्रतिनिधि, सुरक्षाकर्मी, सरोकारवाला निकायका प्रतिनिधि र स्थानीयवासीहरूको उत्साहपूर्ण उपस्थिति रहेको थियो ।
