रानाथारु समुदायले यसरी मनाउँछन् होरी (भिडियो रिपोर्ट)

संस्कृति

गृहपृष्ठ
संस्कृति
रानाथारु समुदायले यसरी मनाउँछन् होरी (भिडियो रिपोर्ट)

रानाथारु समुदायले यसरी मनाउँछन् होरी (भिडियो रिपोर्ट)

मंगलबार, फागुन २३, २०७९NB Media Network

हरिश्चन्द्र बाग, कञ्चनपुर । तराई र भित्री मधेसका जिल्लामा मंगलबार होली पर्व धूमधामका साथ मनाइएको छ । सुदूरपश्चिम प्रदेशका कञ्चनपुर र कैलाली जिल्लामा मात्रै बसोबास गर्ने राना थारु समुदायले भने एक महिनाभन्दा लामो अवधिसम्म मौलिक रूपमा होरी पर्व मनाउने गर्छन् ।

सुदूरपश्चिम प्रदेशको कञ्चनपुर र कैलालीमा मात्रै स्थायी बसोबास गर्दै आएका रानाथारु समुदायको सबैभन्दा ठूलो र महत्त्वपूर्ण पर्व हो होरी । रानाथारु समुदायले माघ शुक्ल पूर्णिमाको दिनमा होरी राखी फागुन पूर्णिमामा जलाउने र त्यसको भोलिपल्ट टीका लगाई आठौँ दिन खख्डेहरा मनाउने नेपाल राना थारु समाज कञ्चनपुरका उपाध्यक्ष मनोहर रानाको भनाइ छ ।

अहिले रानाथारु समुदायमा होरीको रौनक उत्कर्षमा पुगेको देख्न पाइन्छ । फागुन पूर्णिमामा जलाइएको होरीको क्षारको टीका भोलिपल्ट लगाई त्यसै दिनदेखि आठ दिनसम्म आफ्नै मौलिकताका साथ होरी खेल्ने गरिन्छ । होरी रङको पर्व मात्र नभएर रानाथारु समुदायको पहिचान र इतिहास बोकेको चाड हो । होरीले एकापसमा अपनत्व र भाइचारा ल्याई विभेदरहित समाज बनाउन सहयोग पुग्ने अपेक्षा गरिएको छ ।

रानाथारु समुदायले होरीको अन्तिम दिनका रूपमा खख्डेहरा मनाउने गर्दछन् । खख्डेहरा मनाउने दिन सुदूरपश्चिम सरकारले कञ्चनपुर र कैलालीमा सार्वजनिक बिदा दिने गरेको छ । रानाथारु समुदायको सबैभन्दा ठूलो पर्व होरीको रौनक जति पहिले थियो, त्यो भने अहिले देखिँदैन । यस्ता पर्वलाई सभ्य र भव्य तरिकाले मनाउनको लागि पुरानो पिँढीबाट नयाँ पुस्ताले संस्कृति अनुसरण गर्न आवश्यक छ ।

प्रकाशित मिति: मंगलबार, फागुन २३, २०७९