तीव्र सहरीकरण, सवारी साधनको उच्च चापका कारण सवारी दुर्घटना बढिरहेको अवस्थामा जिल्ला ट्राफिक प्रहरी कार्यालय कैलालीले सचेतनामूलक कार्यक्रम सञ्चालन गरिरहेको छ । सवारी साधन दुर्घटना न्यूनीकरण गर्नका लागि कैलाली ट्राफिक प्रहरीले चालकलाई प्रशिक्षण कार्यक्रम सञ्चालन गरिरहेको हो । तोकिएको काम कर्तव्यका साथसाथै सवारी दुर्घटना न्यूनीकरणका लागि हरेक शुक्रबार चालक सचेतना कार्यक्रम सञ्चालन गरिरहेको जिल्ला ट्राफिक प्रहरी कार्यालय कैलालीले जनाएको छ ।
नेपाल प्रहरी भित्रका चर्चित प्रहरी निरीक्षक (इन्स्पेक्टर) वीरेन्द्र जोहारीले कैलाली ट्राफिकको जिम्मा सम्हालेपछि चालक सचेतना कार्यक्रम अघि बढाउनु भएको हो । राजमार्ग, सडक, बजार एवं उच्च सवारी साधनको भिडभाड हुने क्षेत्रमा ठेली लगेर जरिवाना काट्नु भन्दा चालकलाई समयमै सचेत गराउँदा सवारी दुर्घटना न्यूनीकरण कार्यक्रम प्रभावकारी हुने भन्दै कैलाली ट्राफिक प्रहरीले हरेक शुक्रबार चालक सचेतनामूलक कार्यक्रम सञ्चालन गरेको हो । हालसम्म ७ सय ६३ जना चालकलाई सचेतनामूलक प्रशिक्षण दिइएको छ । जिल्ला ट्राफिक प्रहरी कार्यालय कैलालीका इन्चार्ज प्रहरी निरीक्षक वीरेन्द्र जोहारीले सामान्य अज्ञानता अनजान, लापरबाहीका कारण अकालमै ज्यान गुमाउनु पर्ने अवस्था हटाउनका लागि सचेतना कार्यक्रम सञ्चालन गरिएको बताउनु भयो ।
अनुशासन पालना नगर्ने, तीव्र गति, लेन उलङ्घन, मादक पदार्थ सेवन गरेर सवारी साधन चलाउने चालकलाई अभिमुखीकरण गराइन लागेको छ । ट्राफिक नियम पालना नगर्ने चालकलाई समयमै सचेत गराइएसँगै सवारी साधन दुर्घटना न्यूनीकरण हुने अपेक्षा गरिएको छ । यसरी ट्राफिक नियम उलङ्घन गर्ने चालकहरूले समेत कैलाली ट्राफिक प्रहरीको अभियान सह्रानीय भएको बताउनु भएको छ । विगतका ट्राफिक इन्चार्जले चालकसँग बोल्न नरुचाउनेदेखि हप्काउने, धम्काउने, जबरजस्ती जरिवाना गर्ने गरे पनि अहिलेका ट्राफिक इन्चार्जले सौहार्दपूर्ण वातावरणमा दीर्घकालीन रूपमा काम लाग्ने गरी सम्झाई बुझाई गरेर सचेत गराइरहेको उहाँहरूको भनाइ छ ।
