टाइफाइड विरुद्धको खोप अभियानको तयारी अन्तिम चरणमा

स्वास्थ्य

गृहपृष्ठ
स्वास्थ्य
टाइफाइड विरुद्धको खोप अभियानको तयारी अन्तिम चरणमा

टाइफाइड विरुद्धको खोप अभियानको तयारी अन्तिम चरणमा

बुधबार, चैत २३, २०७८NB Media Network

कञ्चनपुर,२३ चैत्र । कञ्चनपुरका एक लाख ६१ हजार ८७५ बालबालिकालाई टाइफाइड विरुद्धको खोप लगाइने भएको छ । चैत २५ देखि वैशाख १८ गतेसम्म १५ महिनादेखि १५ वर्षसम्मका बालबालिकालाई खोप लगाउन स्वास्थ्य कार्यालय कञ्चनपुरले तयारी गरेको हो । कार्यालयका प्रमुख शिवराज सुनारका अनुसार ५२४ खोप केन्द्रमार्फत खोप दिइने छ । खोप कार्यक्रम सञ्चालनका लागि स्वास्थ्यकर्मीलाई तालिम दिइसकिएको र केन्द्रसम्म खोप पु¥याउने काम भइरहेको उहाँले बताउनुभयो ।

यस्तै बेलौरी नगरपालिकामा पनि टाइफाइड विरुद्धको खोप लगाउनका लागि आवश्यक तयारी पुरा भइसकेको बताइएको छ । बुधबार श्रीपुर प्राथमिक स्वास्थ्य केन्द्रको सभा हलमा टाइफाइड खोप अभियान सम्बन्धी वडा खोप समन्वय समितिको अभिमुखीकरण कार्यक्रमको आयोजना गरी सो सम्बन्धी जानकारी दिइएको छ । बेलौरी नगरपालिका वडा नम्बर ४ र ६ का जनप्रतिनिधि, सामुदायिक तथा संस्थागत विद्यालयका प्रमुख तथा प्रतिनिधि र स्वास्थ्य स्वयंसेविकाहरूलाई टाइफाइड खोप अभियान सम्बन्धी जानकारी दिन वडा खोप समन्वय समितिको अभिमुखीकरण कार्यक्रम गरिएको हो ।

यही चैत्र २५ गतेदेखि चैत्र ३० गतेसम्म बेलौरी नगरपालिका भित्रका ५४ वटा खोप केन्द्रबाट १५ महिनादेखि १५ वर्षसम्मका १४ हजार ५ सय बालबालिकालाई टाइफाइड विरुद्धको खोप दिइने बेलौरी नगरपालिका स्वास्थ्य शाखामा कार्यरत सिनियर अहेव मान बहादुर चन्दले जानकारी दिनु भएको छ । ११ हजार बालबालिकालाई सामुदायिक तथा संस्थागत विद्यालय र ३ हजार ५ सय बालबालिकालाई विभिन्न स्वास्थ्य चौकी, आधारभूत स्वास्थ्य केन्द्रका खोप केन्द्रमा टाइफाइड विरुद्धको खोप दिइने उहाँले बताउनु भयो । यस्तै टाइफाइड विरुद्ध दिइने खोपको प्रभावकारिता तथा टाइफाइड रोगका लक्षण, सर्ने तरिका, रोगले निम्त्याउने असर बारे श्रीपुर प्राथमिक स्वास्थ्य केन्द्र बेलौरीका प्रमुख गोविन्द बहादुर बिष्टले प्रष्ट्याउनु भयो । २०० जनासम्म विद्यार्थी भएका विद्यालयमा खोप केन्द्र तोकिएको छ । टाइफाइड विरुद्ध दिइने खोपको प्रभावकारिता ९६.९५ प्रतिशत रहेको स्वास्थ्य विज्ञहरूको भनाइ छ ।