कञ्चनपुर । प्रकाश कलौनीको "मेरा बाबा" नामक देउडा गीत सार्वजनिक भएको छ । चर्चित गायक गोपाल दयालको स्वर रहेको उक्त गीतको निर्माण काठमाडौँमा रहेको म्युजिक प्लस रेकर्डिङ स्टुडियोले गरेको हो । आफ्नै लय तथा शब्द रहेको उक्त गीतमा कलौनीले आफ्नो बुवा गुमाउनुको पीडालाई गीत मार्फत व्यक्त गर्न खोजेका छन् । उक्त गीत नारायण दंगालले एरेन्ज गरेका हुन् भने प्रेम दीप रामजालीले मिक्स / मास्टर गरेका छन्।
को हुन् प्रकाश कलौनी ?
कञ्चनपुर जिल्लाको वेदकोट नगरपालिका वडा नम्बर ०९ लालपुर बस्ने प्रकाश कलौनी बुवा स्व. भानदेव कलौनी र आमा श्रीमती कमला देवी कलौनीको कोखबाट जन्मिएका परिवारको जेठो छोरा हुन् । सुदूरपश्चिमको कला, साहित्य, संस्कृति तथा मौलिकतालाई जोगाउन लामो समयदेखि गीतसङ्गीत तथा अन्य कलात्मक सामग्रीहरूलाई जीवन्त राख्दै आफ्नो पहिचान बनाउन सफल एक युवा हुन् प्रकाश कलौनी । उनले हाल सम्म ‘गाडी गुडी स्वराडमा, शर्माली क्याम्पस गेट, बैतडी कि बसन्ती लाल साडीमा, डोलीमा निक्करी बसेइ, का छै मेरी प्रियसी’ लगायतका बहुचर्चित देउडा गीत रचना गरी अपलोड गरी सकेका छन् । त्यस्तै उनले संस्कृति जगेर्ना गर्ने उद्देश्यले सुदूरका फाग, सगुन, ठाडी भाका, छलिया, हुड्केली, गौरा, देउडा खेलहरू पनि आफ्नो युट्युव च्यानलमा अपलोड गर्दै सुदूरका संस्कृतिबारे ज्ञान दिँदै आएका छन् ।
को हुन् प्रकाशका बुवा ?
बैतडीको तल्लो स्वराड साबिकको शर्माली गाविस वडा नम्बर १ डिस्लानीमा २०२३ सालमा बुवा हरि दत्त कलौनी र आमा सीता पार्वती कलौनीकाे माइला छोराका रूपमा जन्मिएका हुन्, प्रकाशका बुवा भानदेव कलौनी । पाँच दाजुभाइ र एक दिदीसँगै हुर्केका उनी सानै उमेरमा परिवारको आर्थिक स्थिति कमजोर भएका कारण निम्न माध्यमिक तहसम्मको शिक्षा गाउँमै रहेको श्री नागार्जुन माध्यमिक विद्यालयबाट पूरा गरेका हुन् । त्यसपछि कामको लागि भारतका विभिन्न ठाउँमा काम गरेका उनले झण्डै चालीस वर्ष अघि नेपाल विद्युत प्राधिकरणमा जागिर सुरुवात गरेका थिए । आफू जागिरमा लागेपछि परिवारको जिम्मेवारी लिँदै आएका कलौनीको दश वर्ष डडेलधुराको बसाइपछि अछाम सरुवा भएकाे थियाे ।
अछाम जिल्लाको कैलाश खोला जलविद्युत आयोजनामा ८ वर्ष बसाइको दौरानमा उनले हेराली अर्थात् ज्योतिषी कार्य समेत सुरु गरेका थिए । त्यसपछि त्यस क्षेत्रमा निक्कै भिडभाड हुने गर्थ्यो । अछामको मङ्गलसेन आक्रमणपछि कलौनीको सरुवा डोटी जिल्लाको दिपायलमा भएको थियो । त्यहाँ पनि झन्डै ८ वर्षको बसाई तथा त्यस क्षेत्रका हजारौँ मानिसले हेराली मार्फत सेवा लिएका थिए । एकातिर हेराली र अर्को तर्फ जागिरले गर्दा सुदूरपश्चिम प्रदेशका डडेलधुरा, अछाम, डोटी, बैतडी, दार्चुला, कञ्चनपुर लगायतका जिल्लामा उनको बसाइ रह्यो । विद्युत प्राधिकरणमा जागिर तथा हेरालीका कारण कलौनी निकै चर्चित व्यक्ति थिए । २०७९ साल जेठ १८ गते बिहान १०:३० मिनेटमा यो संसारबाट सदाका लागि आफ्नो परिवार र यो समाज छोडेर मृत्युवरण गरेका उनको सम्झनामा उक्त गीत निर्माण गरिएको कलौनीका छोरा प्रकाश बताउँछन् ।
