माधव पौडेल, कञ्चनपुर, ०२ माघ । आइतबार पोखराको सेती नदीको खोचमा भएको जहाज दुर्घटनामा ज्यान गुमाएका मृतकहरूको सम्झनामा कञ्चनपुरको बेलौरीमा पनि शोक सभा आयोजना गरिएको छ ।
बेलौरी बजार स्थित बाल उद्यानमा बेलौरीका स्थानीय व्यापारी, विभिन्न पेसा व्यवसायी तथा बुद्धिजीवी लगायतको उपस्थितिमा मैनबत्ती बाली एक मिनेट मौन धारण गरी शोक सभाको आयोजना गरिएको महाकाली माविका पूर्व प्राचार्य केशवराज जोशीले जानकारी दिनुभयो । त्यस्तै बेलौरी नगरपालिका वडा नम्बर ८ स्थित कलकत्ता बजारमा पनि शोक सभा आयोजना गरी मृतकहरू प्रति श्रद्धाञ्जली व्यक्त गरिएको त्यहाँका स्थानीय एवं नेपाल रेडक्रस सोसाइटी जिल्ला शाखा कञ्चनपुरका सदस्य अशोक पाण्डेयले जानकारी दिनुभयो । कलकत्तामा आयोजित शोक सभामा बेलौरी नगरपालिकाका उपप्रमुख जोगराम चौधरी, वडाध्यक्ष बिश्राम राना लगायतको सहभागिता रहेको बताइएको छ । 
आइतबार काठमाडौँबाट पोखराका लागि उडेको यती एयरलाइन्सको जहाज पोखरा अन्तर्राष्ट्रिय विमानस्थलमा अवतरण गर्ने क्रममा सेती नदीको खोँचमा दुर्घटना भएको थियो । त्यस क्रममा ६८ जना यात्रु र ४ जना चालक दलका सदस्य सहित जम्मा ७२ जना विमानमा सवार रहेकोमा दुर्घटना भएयता ७० जनाको शव फेला परेको र २ जनाको खोजी कार्य जारी रहेको बताइएको छ ।
