हरिश्चन्द्र बाग, कञ्चनपुर, ०९ फागुन । उद्योग, वाणिज्य तथा आपूर्ति मन्त्री दामोदर भण्डारीले कञ्चनपुरको वेदकोट नगरपालिका वडा नम्बर २ मा प्रस्तावित छेला औद्योगिक क्षेत्र सम्पर्क कार्यालय उद्घाटन गर्नुभएको छ । औद्योगिक क्षेत्र व्यवस्थापन लिमिटेडका महानिर्देशक सञ्जय मानन्धरको सभाध्यक्षमा सोमबार आयोजित एक कार्यक्रमका बिच मन्त्री भण्डारीले सम्पर्क कार्यालय उद्घाटन गर्नुभएको वेदकोट नगरपालिका वडा नम्बर ०२ का वडाध्यक्ष नरेश सिंहले जानकारी दिनुभयो ।
२०७२ चैत ०१ गतेका दिन सरकारले साबिक पूर्वमा छेला मुक्त कमैया बस्ती, पश्चिममा दैजी जोगबुढा सडक, उत्तरमा बन क्षेत्र र दक्षिणमा चाँदनीफाँटा बस्ती चार किल्ला तोकी ९ सय बिघा क्षेत्रफलमा दैजी छेला औद्योगिक क्षेत्र विस्तार गर्ने निर्णय गरेको थियो । २०७३ माघ १४ गतेको मन्त्रिपरिषद्को निर्णयबाट साबिकको चार किल्ला संशोधन गरी पूर्वतर्फ छेला मुक्त कमैया बस्ती तथा धेउडीथुमखोल्सा, पश्चिमतर्फ साजगाड खोला, उत्तरतर्फ चुरे वन क्षेत्र तथा दक्षिणतर्फ चाँदनीफाँटा बस्ती (राजमार्ग पश्चिमतर्फको पर्ती जग्गासमेत) कायम गरेको थियो । २०७७ फागुन १० गतेका दिन तत्कालीन प्रधानमन्त्री केपी शर्मा ओलीले दैजी छेला औद्योगिक क्षेत्रको शिलान्यास गर्नुभएको थियो । एक सय प्लटमा औद्योगिक क्षेत्र रहने आयोजनाको कूल लागत रु. ९ अर्ब अनुमान गरिएको छ । त्यस आयोजनाबाट प्रत्यक्ष तथा अप्रत्यक्ष गरी २२ हजार नागरिकले रोजगारी पाउने अपेक्षा गरिएको छ ।
