हरिश्चन्द्र बाग, कञ्चनपुर, १० जेठ । कञ्चनपुरको बेलौरी नगरपालिका वडा नम्बर ८ पचुइमा बाघको आक्रमणबाट ज्यान गुमाएकी गङ्गादेवी चन्दको परिवारलाई रु. १० लाख राहत रकम हस्तान्तरण गरिएको छ । गत बैशाख ८ गते बिहान घरभन्दा करिब एक किलोमिटर पूर्वतर्फ आफ्नै खेतबारीमा घाँस काट्ने क्रममा बाघको आक्रमणमा परी गङ्गादेवी चन्दको मृत्यु भएको थियो । आश्रित परिवार (मृतकका श्रीमान् डम्बर बहादुर चन्द) को बैङ्क खातामा बुधबार राहत रकम रु. १० लाख जम्मा गरिएको हो ।
कञ्चनपुरका प्रमुख जिल्ला अधिकारी गोपाल प्रसाद अर्याल, डिभिजन बन कार्यालयका प्रमुख बन अधिकृत शम्भुप्रसाद तिवारी, शुक्लाफाँटा राष्ट्रिय निकुञ्जका प्रमुख संरक्षण अधिकृत किशोर कुमार मेहता, प्रहरी उपरीक्षक कमल थापा, सशस्त्र प्रहरी नायव उपरीक्षक जनक राज पन्त सहितका सुरक्षाकर्मी, वडाध्यक्ष बिसराम राना सहितका जनप्रतिनिधिहरू, बन कर्मचारीहरू र स्थानीय भद्र भलादमीहरूको उपस्थितिमा वन्यजन्तुबाट हुने क्षतिको राहत सहयोग निर्देशिका बमोजिम नियमानुसार पाउने राहत रकमको निस्सा हस्तान्तरण गरिएको हो । कुण्डा सब डिभिजन बन कार्यालयका प्रमुख दिनेश कुमार यादवका अनुसार यसअघि मृतक चन्दको परिवारलाई राष्ट्रिय प्रकृति संरक्षण कोष (एनटीएनसी) ले किरिया खर्च बापतको रु. ५० हजार रकम सहयोग गरेको थियो ।
घटना स्मरण ः
कञ्चनपुरको बेलौरी नगरपालिका वडा नम्बर ८ पचुइ कालो पुल नजिक घाँस काट्न गएकी ४२ वर्षीया गङ्गादेवी चन्दलाई गत बैशाख ८ गते शुक्रबार बाघले आक्रमण गरी लगेको थियो । बाघले गङ्गादेवीलाई घाँटीमै च्यापेर लगेको सँगैका दौँतरीहरूले आफ्नै आँखाले देखे । उक्त घटना लगत्तै गाउँलेदेखि सुरक्षाकर्मी, बन कर्मचारी, जनप्रतिनिधि, पत्रकारसम्म सबै मिलेर बाघ र ती महिलाको खोजीमा लागे । साँझसम्म कुनै पत्तो नलागेपछि शुक्लाफाँटा राष्ट्रिय निकुञ्जबाट हात्ती सहितको टोली र बर्दिया राष्ट्रिय निकुञ्जबाट प्राविधिकहरूको टोली बोलाइयो । शुक्रबार मध्यरातसम्म हात्ती सहितको प्राविधिक टोलीले खोजी गर्यो तर हात लाग्यो शून्य । भोलिपल्ट शनिबार बिहान पुनः खोजी कार्य गर्दा बाघ फेला पर्यो र त्यसलाई बेहोस बनाई नियन्त्रणमा लिइयो । केही समयपछि बाघले दलदलमा लुकाएको अवस्थामा गङ्गादेवीको शव पनि फेला पर्यो । बाघले आक्रमण गरेकै स्थानमा २२ घण्टापछि गङ्गादेवीको शव भेटिएको थियो । नियन्त्रणमा लिइएको त्यो नरभक्षी बाघलाई हाल सदर चिडियाखाना जावलाखेल ललितपुरमा राखिएको छ ।
