कञ्चनपुर । कञ्चनपुरको दोधाराचाँदनी नगरपालिका वडा नम्बर ३ शिवनगर टोल (जोगबुढा पारी) का दलित बस्तीमा युनिसेफको सहयोगमा बास नेपालले मंगलबार स्वास्थ्य सुरक्षा सामग्रीहरू वितरण गरेको छ । कोभिडको जोखिमबाट बच्नका लागि बास नेपालले २० घरपरिवारलाई स्वास्थ्य सामग्री सहितको किट बक्स सहयोग गरेको बास नेपालका सामाजिक परिचालक हेमा धामीले बताउनु भयो । किट बक्समा मास्क, स्यानिटाइजर, साबुन, थर्मामिटर, पीयूष, लगायतका स्वास्थ्य सामग्री रहेको कोबो रिपोर्टर लक्ष्मी भट्टले जानकारी दिनुभएकाे छ ।
वडा नम्बर ३ कै स्वास्थ्य इन्चार्ज (अ.हे.ब.) मुन्नी साउँदले उक्त स्वास्थ्य सामग्रीहरूको प्रयोग विधि बारे उपस्थित स्थानीयहरूलाई जानकारी गराउनु भएको थियो । युनिसेफको सहयोगमा बास नेपालले कञ्चनपुर सहित सुदूरपश्चिमका विभिन्न जिल्लाहरूमा बाल संरक्षण तथा जोखिमपूर्ण सञ्चारका लागि सामुदायिक संलग्नता र लैङ्गिक हिंसा न्यूनीकरण परियोजना सञ्चालन गर्दै आएको बताइएको छ ।
