कञ्चनपुरमा माओ–समाजवादीको बाम गठबन्धन गर्ने सहमति

राजनीति

गृहपृष्ठ
राजनीति
कञ्चनपुरमा माओ–समाजवादीको बाम गठबन्धन गर्ने सहमति

कञ्चनपुरमा माओ–समाजवादीको बाम गठबन्धन गर्ने सहमति५ वटा पालिका प्रमुखमा माओवादी केन्द्रले र ४ वटामा एकीकृत समाजवादीले उम्मेदवारी दिने

सोमबार, वैशाख १२, २०७९NB Media Network

हरिश्चन्द्र बाग, कञ्चनपुर, १२ बैशाख । आसन्न स्थानीय तहको निर्वाचनका लागि कञ्चनपुर जिल्लामा नेकपा माओवादी केन्द्र र नेकपा एकीकृत समाजवादी पार्टीले गठबन्धन गरेको छ । दुवै पार्टीद्वारा कञ्चनपुरका ९ वटै पालिकाहरू र ९२ वटै वडाहरूमा संयुक्त उम्मेदवारी दिने सहमति भएको नेकपा एकीकृत समाजवादीका जिल्ला उपाध्यक्ष अशोक कुमार चन्दले जानकारी दिनुभयो । बैशाख १२ गते सोमबार बिहान ३ः४५ बजे सम्पन्न दुई दलीय बैठकले कञ्चनपुर जिल्लामा दुई दलीय संयुक्त बाम गठबन्धन गरी संयुक्त रूपमा निर्वाचनमा जाने सहमति गरेको र गठबन्धनका अन्य दलहरूसँग मैत्रीपूर्ण प्रतिस्पर्धा हुने उपाध्यक्ष चन्दले बताउनु भयो ।

सहमति अनुसार कञ्चनपुरका ५ वटा पालिका प्रमुखमा माओवादी केन्द्रले र ४ वटा पालिका प्रमुखमा एकीकृत समाजवादीले उम्मेदवारी दिने छन् । त्यस्तै, ६ वटा पालिका उपप्रमुखमा माओवादी केन्द्रले र ३ वटा पालिका उपप्रमुखमा एकीकृत समाजवादीले उम्मेदवारी दिने बताइएको छ । ९२ वटा वडाहरूमध्ये माओवादी केन्द्रले ५२ वटा वडाहरूमा र एकीकृत समाजवादीले ४० वटा वडाहरूमा उम्मेदवारी दिने सहमति भएको छ । नेपाली काँग्रेससँग समेत संयुक्त गठबन्धनका लागि लामो समयसम्म छलफल गरिए पनि काँग्रेसले कञ्चनपुरमा गठबन्धन नगर्ने अडान लिएपछि अन्ततः माओ–समाजवादीको बाम गठबन्धन गर्ने सहमति गरिएको बताइएको छ ।