लालझाडीको भानु माविमा सिभिल इन्जिनियरिङ पढाइ हुने

शिक्षा

गृहपृष्ठ
शिक्षा
लालझाडीको भानु माविमा सिभिल इन्जिनियरिङ पढाइ हुने

लालझाडीको भानु माविमा सिभिल इन्जिनियरिङ पढाइ हुने

बुधबार, वैशाख ६, २०८०NB Media Network

कञ्चनपुर । कञ्चनपुरको लालझाडी गाउँपालिका २ कञ्जमा रहेको भानु माध्यमिक विद्यालयमा सिभिल इन्जिनियरिङ विषयको समेत पढाइ हुने भएको छ । शिक्षा, विज्ञान तथा प्रविधि मन्त्रालयले गत २९ चैत्र ०७९ मा मन्त्री स्तरीय निर्णयबाट प्राविधिक धार तर्फ कक्षा (९ देखि १२ सम्म) मा सिभिल इन्जिनियरिङ पढाइको अनुमति दिने निर्णय गरेको थियो । भानु माध्यमिक विद्यालयका प्रधानाध्यापक वेद प्रसाद उपाध्यायले विद्यालयबाट माग भए बमोजिम शिक्षा, विज्ञान तथा प्रविधि मन्त्रालयको निर्णय अनुरूप इन्जिनियरिङ विषय पढाइका लागि अनुमति पाएको बताउनु भयो । प्रधानाध्यापक उपाध्यायले सिधै मन्त्रालयबाट अनुदान उपलब्ध गराउने गरी इन्जिनियरिङ विषय पठनपाठन गराउने भानु विद्यालय कञ्चनपुरकै पहिलो भएको दाबी गर्नुभयो ।

प्रधानाध्यापक उपाध्यायले सामाजिक संजालमा खुसी व्यक्त गर्दै लेख्नुभएको छ, "हाम्रो यस श्री भानु माध्यमिक विद्यालय लालझाडी -२, कञ्ज कञ्चनपुरलाई यसै शैक्षिक वर्ष २०८० देखि शिक्षा तथा मानव स्रोत विकास केन्द्र सानोठिमी भक्तपुर बाट सिभिल इन्जिनियरिङ कक्षा (९-१२) सञ्चालन अनुमति प्राप्त भएको छ । यसका लागि सहयोग गर्ने लालझाडी गा पा अध्यक्ष निर्मल राना ज्यू, उपाध्यक्ष सपना राना चौधरी ज्यू, शिक्षा अधिकृत सिद्धराज भट्ट ज्यू तथा वडा अध्यक्ष आशाराम राना ज्यू लगायत सम्पूर्ण गा पा टिम, यस विद्यालयको वि व्य स अध्यक्ष प्रकाश राना सहित वि व्य स टिमलाई हार्दिक धन्यवाद दिन चाहन्छु । साथै यस विद्यालयको सेवा क्षेत्रका बालबालिकालाई अध्ययन कोटा सीमित भएकाले समयमै भर्ना भई अवसरको फाइदा उठाउन हुन् अभिभावक ज्यू हरूलाई अनुरोध गर्दछु!"

भानु माध्यमिक विद्यालय व्यवस्थापन समितिका अध्यक्ष प्रकाश रानाले ग्रामीण भेगमा प्राविधिक शिक्षा सञ्चालन गर्ने योजना अनुरूप शिक्षा मन्त्रालयबाट अनुमति पाएसँगै चालु शैक्षिक सत्रदेखि नै कक्षा सञ्चालन हुने बताउनु भयो । यस कार्यमा महत्वपूर्ण भूमिका निर्वाह गरेको लालझाडी गाउँपालिकाका अध्यक्ष निर्मल रानाले अब गाउँका विपन्न, गरिब, किसानका छोराछोरीले समेत गाउँमै प्राविधिक शिक्षा अध्ययन गर्न पाउने भएपछि खुसी व्यक्त गर्नुभयो । गाउँमै प्राविधिक शिक्षा सञ्चालन हुने भएपछि स्थानीय बासिन्दा समेत हर्षित भएका छन् । यसअघि गाउँमा प्राविधिक धारका विद्यालय नहुँदा लालझाडीका विद्यार्थीले मोटो रकम खर्च गरेर अन्य विभिन्न स्थानमा अध्ययनका लागि जानुपर्ने बाध्यता थियो । अहिले विद्यालयले नयाँ भर्ना अभियान समेत संचालन गरेको छ ।

प्रकाशित मिति: बुधबार, वैशाख ६, २०८०