विकास सिंह महता, कञ्चनपुर । कञ्चनपुरको दक्षिणी क्षेत्र बेलौरी नगरपालिका वडा नम्बर २ गोकुलपुरमा आयोजना गरिएको १३ औँ जिल्ला स्तरीय राष्ट्रपति रनिङ शिल्ड छनौट प्रतियोगिताको उपाधि भीमदत्त नगरपालिकाले हात पारेको छ । फागुन ८ देखि १० गतेसम्म सञ्चालन भएको प्रतियोगितामा भीमदत्त नगरपालिकाको टिमले २१ स्वर्ण, १० रजत र ८ कास्य गरी ३९ पदकका साथ प्रथम स्थान हासिल गरेको हो । उक्त प्रतियोगितामा शुक्लाफाँटा नगरपालिकाले ९ स्वर्ण, १३ रजत र ८ कास्य गरी ३० पदक हात पार्दै द्वितीय स्थान र कृष्णपुर नगरपालिकाले ४ स्वर्ण, ५ रजत, ६ कास्य गरी १५ पदकका साथ तृतीय स्थान हासिल गरेको छ ।
जिल्ला स्तरीय छनौट प्रतियोगितामा कञ्चनपुरका सबै ९ वटै पालिकाका विद्यार्थीहरूको सहभागिता रहेको थियो । जसमा १ हजार ८८ छात्र छात्रा खेलाडी र प्रशिक्षक लगायत १२ सयको हाराहारीको उपस्थिति रहेको थियो । जिल्ला छनोट प्रतियोगितामा छनोट भएका खेलाडीहरू जिल्लाको प्रतिनिधित्व गर्दै प्रदेश स्तरीय छनौट प्रतियोगितामा सहभागी हुनेछन् भने प्रदेशमा छनौट भएपछि प्रदेशको प्रतिनिधित्व गर्दै राष्ट्रिय स्तरीय प्रतियोगितामा सहभागी हुने जिल्ला खेलकुद समितिका उपाध्यक्ष कैलाश चन्द्र गिरिले जानकारी दिनुभयो । आगामी वर्ष हुने १४औँ जिल्ला स्तरीय राष्ट्रपति रनिङ शिल्ड छनौट प्रतियोगिता भने कृष्णपुरमा आयोजना गरिने जनाइएको छ । प्रतियोगिता सञ्चालन गर्नको लागि एक कार्यक्रमका बिच कृष्णपुर नगरपालिका नगर प्रमुख हेमराज ओझालाई झण्डा समेत हस्तान्तरण गरिएको जिल्ला खेलकुद समिति कञ्चनपुरका अध्यक्ष कुबेर खडकाले बताउनु भयो ।
