शुक्लाफाँटा ११ अमरपुरमा वडा स्तरीय फुटबल प्रतियोगिताको समुद्घाटन

खेलकुद

गृहपृष्ठ
खेलकुद
शुक्लाफाँटा ११ अमरपुरमा वडा स्तरीय फुटबल प्रतियोगिताको समुद्घाटन

शुक्लाफाँटा ११ अमरपुरमा वडा स्तरीय फुटबल प्रतियोगिताको समुद्घाटन

मंगलबार, वैशाख १२, २०८०NB Media Network

कञ्चनपुर । अमरपुर युवा क्लबको आयोजनामा कञ्चनपुरको शुक्लाफाँटा नगरपालिका वडा नम्बर ११ अमरपुरमा वडा स्तरीय फुटबल प्रतियोगिताको समुद्घाटन गरिएको छ । नगरपालिका भित्र रहेका ९ ओटा टिमहरूले खेलमा सहभागिता जनाएका छन् । मंगलबार शुक्लाफाँटा नगरपालिकाका नगर उपप्रमुख कल्पना जोशी पन्तको प्रमुख आतिथ्यमा सञ्चालित कार्यक्रममा बोल्दै नगर उपप्रमुख कल्पना जोशी पन्तले युवाहरूले खेलकुद मार्फत नै नगरपालिकालाई सर्वोपरि रूपमा पहिचान गर्न सफल भएको भन्दै धन्यवाद ज्ञापन गरेका छन् ।

केही समय अगाडी नगरपालिकामा भएको राष्ट्रपति रनिङ्ग शिल्ड प्रतियोगिता, जिल्ला स्तरीय खेलकुद र परशुराम नगरपालिकामा विभिन्न खेलकुदका विधामा अनुशासित, मिहिनेती र लगनशील भएर खेल खेली पहिलो, दोस्रो स्थान हासिल गरेको उदाहरण दिँदै यो खेलकुदमा सहभागी खेलाडीहरूले समेत अनुशासित र लगनशील भएर खेल खेल्न आग्रह गरेका छन् । युवाहरूकै लागि शुक्लाफाँटा नगरपालिका र नगरपालिका मातहतका वडा कार्यालयहरूले खेलाडी र युवा क्लबहरू, खेल सामग्रीकै लागि रकम विनियोजित गरेर वडागत रूपमा विभिन्न खेलाडी र युवा क्लबहरूलाई खेल सामग्री एवं पुरस्कार वितरण गरिँदै आएको बताए । साथै युवा वर्गहरू र खेलको माध्यमबाट समाज परिवर्तनको लागि लागिपरेका खेलाडी मित्रहरूले लागु औषध न्यूनीकरण, दुर्व्यसनी न्यूनीकरण, बालविवाह न्यूनीकरण जस्ता सचेतनामूलक कार्यक्रमको माध्यमबाट समेत समाजमा जनचेतना फैलाउन आग्रह गरेका छन् । नगरपालिकाका सम्पूर्ण खेलाडीहरूको लागि खेल मैदान, कबडहल, खेल सामाग्रीको अभाव हुन् नदिने प्रतिबद्धता जनाइन् ।

त्यस्तै कार्यक्रममा विशिष्ट अतिथि रहेका वडा नम्बर ९ का वडा अध्यक्ष रमेश बहादुर ऐरले कार्यक्रममा बोल्दै वडा कार्यालयको तर्फबाट गर्नुपर्ने सहयोगको लागि प्रतिबद्ध रहेको जानकारी गराएका छन् । सबै खेलाडीहरूले अनुशासित र मैत्रीपूर्ण रूपमा खेल खेली वडा र नगरपालिकाको नाम चिनाउने कार्य गर्न हार्दिक अपिल गरेका छन् । कार्यक्रममा न्यायिक समिति सदस्य तथा वडा नम्बर ७ का वडा सदस्य केशव ठगुन्ना, वडा नम्बर ७ कै वडा सदस्य धिरेन्द्र प्रसाद भट्ट, शुक्लाफाँटा खबर दैनिक पत्रिकाका सम्पादक जय बहादुर ऐर, कृष्ण सामुदायिक उपभोक्ता समूहका अध्यक्ष अमर बहादुर ऐर लगायत समाजसेवी, स्थानीय र खेलाडीहरूको उपस्थिति रहेको कार्यक्रममा सभापति युवा क्लबका अध्यक्ष दल बहादुर ऐर रहेका थिए भने कार्यक्रमको सञ्चालन सुरज ऐरले गरेका थिए । फुटबल खेल आजदेखि नियमित रूपमा सञ्चालन हुने आयोजक टिमले जानकारी गराएको छ । साथै आज वडा नम्बर ३ र वडा नम्बर ९ सिसैया टिमको खेल भएको जानकारी गराइएको छ ।

प्रकाशित मिति: मंगलबार, वैशाख १२, २०८०