कञ्चनपुर, १३ असार । कञ्चनपुरको वेदकोट घर भई डडेलधुराको आलिताल गाउँपालिकामा कार्यरत कम्प्युटर अपरेटर लोकेन्द्र सिंह भण्डारीलाई एक समूहले लुटपाट गरेको छ । सोमबार मध्यान्ह आफ्नो घर वेदकोट नगरपालिका वडा नम्बर ३ सामादैजीबाट डडेलधुराको आलिताल जाने क्रममा ३७ वर्षीय भण्डारी कैलालीको गोदावरी माथिको उकालोमा लुटिएको प्रहरीले जनाएको छ । भण्डारी सवार प्रदेश ३ -०१-२३च ८७२१ नम्बरको निजी गाडीमा लिफ्ट मागेर वेदकोटबाट सँगसँगै रहेका भारतीय नागरिक जस्तै देखिने र हिन्दी बोल्ने तीन जनाको समूहले लुटपाट गरेको भण्डारीलाई उद्धृत गर्दै इलाका प्रहरी कार्यालय मालाखेतीका प्रहरी नायव उपरीक्षक रवीन्द्र राज पाण्डेयले जानकारी दिनुभयो ।
तेल खर्च दिने भन्दै कैलालीको खानीडाँडासम्मको लिफ्ट मागेको उक्त समूहले गोदावरी माथिको बुढितोला उकालो गाईमारा मोडमा पुगेपछि फोटो खिच्ने भन्दै गाडीबाट झरेको र त्यसै क्रममा उनीहरूले भण्डारीलाई लुटपाट गरेको खुल्न आएको छ । प्रहरीका अनुसार भण्डारीलाई टाउकोमा ढुङ्गाले प्रहार गरी हातखुट्टा र मुख बाँधेर भीरबाट २०० मिटर तल खसालिएको थियो । भण्डारीको टाउकोमा गम्भीर चोट लागेको छ । प्रहरीले भण्डारीको उद्धार गरी अस्पताल पुर्याएको छ । लुटेराहरूले कार सहित एटिएम कार्ड, नगद रुपैयाँ लगायतका सबै जिन्सी तथा नगद सरसामान लुटेर लगी फरार भएको र उनीहरूको खोजी कार्य जारी रहेको प्रहरीले जनाएको छ ।
