हरिश्चन्द्र बाग, कञ्चनपुर, ०९ माघ । कञ्चनपुरमा ठूलो मात्रामा अवैध काठ बरामद गरिएको छ । भीमदत्त नगरपालिका वडा नम्बर ३ तिलकपुर र लालझाडी गाउँपालिका वडा नम्बर ४ देखतभुलीबाट अवैध काठसहित ८ जनालाई पक्राउ गरिएको प्रहरीले जनाएको छ । गए राति भीमदत्त नगरपालिका वडा नम्बर ३ तिलकपुर स्थित सहिद सामुदायिक बनबाट सोही ठाउँ बस्ने ३८ वर्षीय सागर बिष्टले चलाएको म. १ त. ६९८ नम्बरको ट्याक्टरमा ५ थान (३५.५ क्यु.फिट) सिसमको गोलिया ल्याउँदै गरेको भन्ने गोप्य सूचनाको आधारमा जिल्ला प्रहरी कार्यालय कञ्चनपुरबाट प्रहरी निरीक्षकको नेतृत्वमा खटिएको प्रहरी टोलीले उक्त काठ फेला पारी बरामद गरेको हो । ट्याक्टर, काठ, आरा र चालक सहित नियन्त्रणमा लिई थप कार्य भइरहेको प्रहरीले जनाएको छ ।
यस्तै, लालझाडी गाउँपालिका वडा नम्बर ४ देखतभुलीमा डिभिजन वन कार्यालय कञ्चनपुर, लालझाडी सब-डिभिजन वन कार्यालय देखतभुली, सब-डिभिजन वन कार्यालय वाणी कञ्चनपुर र अस्थायी प्रहरी पोष्ट वाणीबाट खटिएको संयुक्त टोलीले उक्त स्थानमा बस्ने मौले राना, सुबिता राना, काली राना, मोती राना, भङ्गी राना, विक्रम राना र कृष्णपुर नगरपालिका वडा नम्बर ४ बस्ने हरि चौधरीको घर आँगनमा लुकाई छिपाई राखिएको २४५.७५५५ क्यु.फिट अवैध सालको चिरान काठ र गोलिया बरामद गरी आवश्यक कारबाहीको लागि वाणी सव डिभिजन वन कार्यालय वाणीमा बुझाइएको जिल्ला प्रहरी कार्यालय कञ्चनपुरका सूचना अधिकारी प्रहरी निरीक्षक भरत राज गिरीले जानकारी दिनुभएको छ ।
