११ वर्षकै उमेरमा मेची-महाकाली साइकल यात्रा गर्दै कञ्चनपुरका रमित भट्ट

प्रेरक प्रसंग

गृहपृष्ठ
प्रेरक प्रसंग
११ वर्षकै उमेरमा मेची-महाकाली साइकल यात्रा गर्दै कञ्चनपुरका रमित भट्ट

११ वर्षकै उमेरमा मेची-महाकाली साइकल यात्रा गर्दै कञ्चनपुरका रमित भट्ट

मेची-महाकाली साइकल यात्रा गर्ने नेपाल कै कान्छा साइकल यात्री

बिहीबार, मंसिर २, २०७८NB Media Network

हरिश्चन्द्र बाग, कञ्चनपुर, ०२ मङ्सिर । कञ्चनपुरको बेलौरी नगरपालिका वडा नम्बर ६ भुराकोटका दीपक भट्ट र पार्वती भट्टका ११ वर्षीय सुपुत्र रमित भट्ट मेचीदेखि महाकालीसम्मको साइकल यात्राका लागि पूर्वी नेपाल तर्फ प्रस्थान गरेका छन् । “मोटरसाइकल होइन, साइकल चलाऔँ; कुलतबाट बचौँ र स्वस्थ रहौँ“ भन्ने नारा लिएर उनले यही मङ्सिर चार गते मेची पुलदेखि साइकल यात्रा सुरु गर्ने योजना बनाएका छन् ।

बेलौरी स्थित वात्सल्य विद्या निकेतनमा कक्षा ६ मा अध्ययनरत साइकल यात्री भट्टलाई विद्यालय परिवारले बुधबार एक कार्यक्रम गरी शुभकामना सहित साइकल यात्राका लागि बिदाइ गरेको छ । वात्सल्य विद्या निकेतनमा भट्टकै अध्यक्षतामा साइकल क्लब समेत गठन गरी विद्यार्थीहरूलाई प्रोत्साहन गरिरहेको र आगामी दिनमा यसलाई अभियानकै रूपमा लैजानु पर्ने वात्सल्य विद्या निकेतनका प्रिन्सिपल लक्ष्मण सिंह दियालको भनाइ छ ।

११ वर्षीय रमित भट्टलाई मेची–महाकाली साइकल यात्रा गर्ने नेपाल कै कान्छा साइकल यात्रीको रूपमा हेरिएको छ । उनलाई साइकल यात्रामा मार्गदर्शन गर्न उनका बुवा दीपक भट्टले पनि सँगै साइकल यात्रा गर्ने बताइएको छ । नेपाली सेनाबाट हालै सेवा निवृत्त भएका दीपक भट्टले पनि विगत लामो समयदेखि विभिन्न क्षेत्रको साइकल यात्रा गरिसकेका छन् । बेलौरीलाई साइकल सिटीका रूपमा चिनाउने उनको योजना छ ।

कोभिड १९ को महामारीबाट थला परेको साइकल यात्रालाई चलायमान बनाउन गत वर्ष केही साइकल यात्रीहरूले सामूहिक रूपमा पश्चिमको महाकालीदेखि पूर्वको मेचीसम्म साइकल यात्रा गरेका थिए । मानव स्वास्थ्य, पर्यावरण र पर्यटनका लागि समेत महत्त्वपूर्ण मानिएको साइकल यात्रालाई प्रवर्द्धन गर्नका लागि राज्यले पनि सक्रियता बढाउनुपर्ने देखिन्छ ।

प्रकाशित मिति: बिहीबार, मंसिर २, २०७८