हरिश्चन्द्र बाग, कञ्चनपुर, १७ कार्तिक । सुदूरपश्चिम प्रदेशका मुख्यमन्त्री त्रिलोचन भट्टले कञ्चनपुरको दक्षिणी क्षेत्रका बाढी तथा डुबानबाट बढी प्रभावित बस्तीहरूको स्थलगत निरीक्षण गर्नु भएको छ । मुख्यमन्त्री भट्टसँगै प्रतिनिधि सभा सदस्य बिना मगर, प्रदेश सभा सदस्य कुलवीर चौधरी र स्थानीय तहहरूका जनप्रतिनिधिहरू लगायतको टोलीले बुधवार कञ्चनपुरका बेलौरी, पुनर्वास, बेलडाँडी र लालझाडीका विभिन्न स्थानको निरीक्षणका साथै त्यस क्षेत्रका जनसमुदायसँग प्रत्यक्ष छलफल गर्नुभएको हो । त्यस क्रममा मुख्यमन्त्री भट्टले प्रदेश सरकारद्वारा उक्त क्षेत्रको लागि तत्काल आवश्यक पहल लिने प्रतिबद्धता जनाउनु भएको मुख्यमन्त्रीका प्रमुख स्वकीय सचिव शिव ओलीले जानकारी दिनुभयो ।
