पुनर्वासमा मतदान कार्य स्थगित

स्थानीय सरकार

गृहपृष्ठ
स्थानीय सरकार
पुनर्वासमा मतदान कार्य स्थगित

पुनर्वासमा मतदान कार्य स्थगित

विवादित क्षेत्रमा अर्को दिन पुनः चुनाव हुने

शुक्रबार, वैशाख ३०, २०७९NB Media Network

हरिश्चन्द्र बाग, कञ्चनपुर, ३० बैशाख । कञ्चनपुर पुनर्वास नगरपालिका वडा नम्बर १० भीमबस्तीको विजय मावि मतदान केन्द्रमा विवाद हुँदा मतदान कार्य नै स्थगित गरिएको छ । मृत्यु भइसकेका र विदेशमा रहेका व्यक्तिहरूको नामबाट फर्जी मत हालेको भन्दै राजनीतिक दलका प्रतिनिधिहरूले विरोध गरेपछि विवाद भएको हो । दिउँसो १ बजेदेखि स्थगित भएको मतदान कार्य पुनः सुचारु गर्न सर्वदलीय सर्वपक्षीय छलफल गरिए पनि सहमति हुन नसक्दा मतदान कार्य नै स्थगित गर्नु परेको पुनर्वासका निर्वाचन अधिकृत किरण जोशीले जानकारी दिनुभयो ।

पुनर्वासका अन्य मतदान स्थलहरूमा भने निर्विवाद मतदान कार्य सम्पन्न भएको छ । मत पेटिकाहरू सङ्कलन गर्ने कार्य गरिएको निर्वाचन अधिकृत जोशीले बताउनुभयो । विवादित ठाउँमा निर्वाचन आयोगले सूचना जारी गरेको समयमा पुनः मतदान गरिने बताइएको छ । योसँगै पुनर्वास नगरपालिकामा अर्को व्यवस्था नभएसम्मका लागि मत गणना सहित निर्वाचनका सबै कार्यक्रम स्थगित गरिएको छ । कञ्चनपुरका अन्य पालिकाहरूमा भने निर्बाध रूपमा मतदान सम्पन्न भएको बताइएको छ । मत पेटिकाहरू गणना स्थलमा जम्मा गरिसकेपछि मत गणना सुरु गरिने छ ।

प्रकाशित मिति: शुक्रबार, वैशाख ३०, २०७९