रानाथारु समुदायमा होरीको रौनक; बेलौरीमा मनाइयो होरी मिलन कार्यक्रम

संस्कृति

गृहपृष्ठ
संस्कृति
रानाथारु समुदायमा होरीको रौनक; बेलौरीमा मनाइयो होरी मिलन कार्यक्रम

रानाथारु समुदायमा होरीको रौनक; बेलौरीमा मनाइयो होरी मिलन कार्यक्रम

शनिबार, फागुन २०, २०७९NB Media Network

हरिश्चन्द्र बाग, कञ्चनपुर । कञ्चनपुर र कैलालीमा बसोबास गर्ने रानाथारु समुदायले आफ्नो सबैभन्दा ठूलो महत्त्वपूर्ण पर्व होरी पर्व मनाइरहेका छन् । रानाथारु समुदायले एक महिना लामो समयसम्म मनाउने होरी पर्वको अवसरमा अहिले विभिन्न क्षेत्रमा विविध सांस्कृतिक कार्यक्रमहरु समेत आयोजना गरिएका छन् । जसले गर्दा अहिले रानाथारु समुदायमा होरीको रौनक उत्कर्षमा पुगेको देख्न पाइन्छ । रानाथारु समुदायले होरीको अन्तिम दिनका रूपमा खखडेहरा मनाउने गर्दछन् । खखडेहराको अवसरमा सुदूरपश्चिम प्रदेश सरकारले कञ्चनपुर र कैलालीका सम्पूर्ण सरकारी कार्यालयहरू एवं सार्वजनिक निकायहरूमा सार्वजनिक बिदा दिने गरेको छ ।

यसैबिच कञ्चनपुरको बेलौरीमा रानाथारुको बृहत् होली मिलन कार्यक्रम गरिएको छ । रानाथारु भलमन्सा तथा पधना समिति बेलौरीको आयोजना तथा बेलौरी नगरपालिकाको सह आयोजनामा शनिबार उक्त कार्यक्रम आयोजना गरिएको रानाथारु भलमन्सा तथा पधना समितिका बेलौरीका नगर अध्यक्ष सुरेश कुमार बडायकले जानकारी दिनुभयो । कार्यक्रमलाई सम्बोधन गर्दै पूर्व खानेपानी मन्त्री बिना मगरले होरी पर्व रङ्गको पर्व मात्र नभएर रानाथारु समुदायको पहिचान र इतिहास बोकेको पर्व समेत रहेको उल्लेख गर्नुभयो । होरीले एकापसमा अपनत्व, मिलनसारिता र सुमधुरता ल्याउने पर्व रहेको बताउँदै यसले विभेदरहित समाज बनाउन सहयोग पुग्ने पुर्वमन्त्री मगरको भनाइ छ । कार्यक्रममा विभिन्न वडा तथा राना गाउँबाट प्रतिनिधित्व गर्दै होरी विशेष सांस्कृतिक प्रस्तुतिहरू समेत प्रदर्शन गरिएका थिए भने कार्यक्रम स्थलमा मुख्य आकर्षकका रूपमा डोला समेत खेल्ने व्यवस्था गरिएको आयोजकले जनाएको छ ।

प्रकाशित मिति: शनिबार, फागुन २०, २०७९