हरिश्चन्द्र बाग, कञ्चनपुर, १८ फागुन । कञ्चनपुरको बेलौरीमा वृहत् विज्ञान प्रदर्शनी कार्यक्रम गरिएको छ । बेलौरीमा रहेको विज्डम एकेडेमीले मंगलबार विद्यालयमा वृहत् विज्ञान प्रदर्शनी कार्यक्रम गरेको हो । विज्ञान र आविष्कार सम्बन्धी विद्यार्थीहरु र समुदायलाई समेत जानकारी दिने उद्देश्यले विज्डम एकेडेमीकै विद्यार्थीहरुले तयार गरेका विभिन्न सामग्रीका नमुनाहरु प्रदर्शन गरिएको छ । विज्ञान सम्बन्धी विभिन्न आविष्कारहरु र कलात्मक शैलीलाई थप अभिवृद्धि गर्ने उद्देश्यले कञ्चनपुरको बेलौरीमा रहेको विज्डम एकेडेमीमा अध्ययनरत आधारभूत र मावि तहका विद्यार्थीहरूले तयार गरेका कलात्मक तथा सन्देशमूलक विज्ञान सामग्रीका नमुना प्रदर्शन गरिएको विद्यालयका प्रधानाध्यापक गोविन्द सिंह थापाले जानकारी दिनुभयो ।
बेलौरी नगरपालिकाका विद्यालय निरीक्षक देव बहादुर चन्द, सामुदायिक विद्यालयका पूर्वप्रधानाध्यापक तथा बुद्धिजीविद्वय प्रेमसिंह बोहरा र श्याम कुमार पाण्डेयको टोलीले विज्ञान प्रदर्शनीको मुल्यांकन गरेको छ । बेलौरी नगरपालिकाका प्रमुख प्रशासकीय अधिकृत नेत्र प्रसाद पौडेल सहित कर्मचारीहरु, स्थानीय जनप्रतिनिधि, बुद्धिजीवी, अभिभावकहरू, अन्य विद्यालयका शिक्षक प्रतिनिधि तथा विद्यार्थीहरू, सञ्चारकर्मी लगायतले वृहत् विज्ञान प्रदर्शनी कार्यक्रमको अवलोकन गर्नुभएको विद्यालयका सहायक प्रधानाध्यापक टेक बहादुर शाहीले बताउनुभयो ।
विज्डम एकेडेमीले आयोजना गरेको वृहत् विज्ञान प्रदर्शनी कार्यक्रम उदाहरणीय र महत्वपूर्ण भएको बताउँदै बुद्धिजीवी प्रेमसिंह बोहराले अन्य विद्यालयहरूले समेत यस्ता गतिविधि गर्नुपर्नेमा जोड दिनुभयो । उहाँले पछिल्लो समयमा थुप्रै बालबालिकाहरू मोबाइल तथा इन्टरनेटको गलत प्रयोगमा अभ्यस्त भइरहेको प्रति चिन्ता समेत व्यक्त गर्नुभयो । त्यस्तै, अभिभावकहरू र अन्य अवलोकनकर्ताहरूले ग्रामीण क्षेत्रमै पनि विद्यार्थीहरूको कलात्मक क्षमता र लगनशीलताको सह्राहना गर्नुभएको छ । आगामी वर्षमा यस किसिमका कार्यक्रमलाई खुल्ला प्रतियोगिताका रूपमा आयोजना गर्ने विद्यालयको योजना रहेको छ । यस किसिमका अतिरिक्त क्रियाकलापहरु अन्य विद्यालयले समेत गर्न सके शैक्षिक क्षेत्रमा नयाँ आयाम ल्याउन सकिनेमा दुईमत छैन ।
NULL
